Қирғизистонда 14 январдан бошлаб валюта айирбошлаш шохобчалари мижозларнинг ҳужжатлари ва пул манбасини текшириш ҳуқуқига эга бўлади. Бу ҳақда 24.кг хабар берди.
Миллий банк валюта айирбошлаш шохобчалари учун янги қоидаларни тасдиқлади. У Қирғизистон фуқаролари ва хорижликларга бирдек татбиқ этилади. Регуляторнинг тушунтиришича, бу қарор даромадларни легаллаштириш ва молиявий жиноятларга қарши курашиш учун қабул қилинган.
Айирбошлаш шохобчалари учун жорий этилаётган мажбуриятлар:
- мижозларни, шу жумладан, чет элликларни ва уларнинг ҳужжатларини текшириш;
- маблағлар манбаини аниқлаштириш (зарурат бўлганда);
- йирик ва ғайриоддий операцияларга алоҳида эътибор қаратиш;
- шубҳали операцияларни тўхтатиб туриш ва бу ҳақда Қирғизистон Республикаси Миллий банкини хабардор қилиш;
- валюта айирбошлаш операциялари бўйича маълумотларни камида беш йил давомида сақлаш.
Аксарият мижозлар учун валюта айирбошлаш жараёни аввалгидек одатий тартибда давом этади. Бироқ йирик миқдордаги маблағлар ёки ноодатий операциялар амалга оширилганда, айирбошлаш шохобчалари ходимлари қўшимча ҳужжатларни сўраши мумкин.
