Қирғизистонда бир нечта сиёсий арбоблар ва собиқ президент Алмазбек Атамбаевнинг ўғли Қодирбек Атамбаев қўлга олинди. Бу ҳақда 24.kg хабар берди.
Қўлга олинганлар орасида Қирғизистон Миллий хавфсизлик давлат қўмитаси (МХДҚ) давлат қўриқлаш хизмати собиқ раҳбари Дамир Мусакеев, социал-демократлар сиёсий партияси етакчиси Темирлан Султонбеков, Қирғизистон парламентининг собиқ депутатлари Шайлобек Атазов ва Кубаничбек Қодиров бор.
Ички ишлар вазирлиги баёнотига кўра, қўлга олинган беш нафар шахс парламент сайловлари якунлари эълон қилингач, “оммавий норозилик кайфияти бор деган тасаввур яратиш мақсадида митинглар бошлашни” режалаштирган. Хусусан, улар “конституцияга зид талаблар”ни илгари суриш ва “маъмурий бинолар, телеканаллар, куч тузилмалари объектлари, қурол-яроғ ҳамда жазони ижро этиш муассасаларини эгаллаб олишга уриниш”ни кўзлаган.
ИИВнинг таъкидлашича, ушбу ҳаракатларга куч билан кўмаклашишни “жиноят олами вакиллари” зиммасига олиши режалаштирилган.
“Тинтувлар чоғида қурол-яроғ, ўқ-дорилар, гранаталар, алоқа воситалари, молиялаштириш ҳужжатлари, ҳаракат режалари, гиёҳванд моддалар, шунингдек, 150 минг АҚШ доллари миқдоридаги пул маблағлари мусодара қилинди”, дея хабар берди вазирлик матбуот хизмати.
Ушланганларга мамлакат Жиноят кодексининг “Оммавий тартибсизликларни уюштиришга тайёргарлик кўриш” моддаси бўйича айблов эълон қилинган. Жами 10 киши қўлга олинган. Уларнинг барчаси суд қарори билан 2026 йил 17 январга қадар тергов изоляторида қолади.
Қўлга олинган барча шахсларнинг иш материалларида 36-модда — “Жиноятга тайёргарлик кўриш” ва 41-модда — “Жиноят иштирокчиларининг турлари” қайд этилган. Жиноят таснифига кўра, уларга нисбатан яна икки модда қўлланган:
- 278-модда — “Оммавий тартибсизликларни ташкил этиш” (етти нафар шахс);
- 326-модда — “Ҳокимиятни зўрлик билан эгаллаш” (уч нафар шахс).
Қирғизистон парламентига муддатидан олдинги сайловлар 30 ноябрь куни ўтказилади. Улар дастлаб 2026 йил ноябрига мўлжалланган эди, бироқ 25 сентябрь куни депутатлар ўз ваколатларини ихтиёрий равишда топширди.
