Тошкент вилоятида манзил-колониядан қочган маҳкум 3-синф ўқувчисини зўрлагани ҳақидаги хабарлар тарқалди. Вилоят Ички ишлар бошқармаси матбуот хизмати бу шахснинг қўлга олинганини маълум қилди.
Расмий маълумотга кўра, 1994 йилда туғилган **М.Т.**га нисбатан Жиноят кодексининг 119-моддаси 4-қисми — «жинсий эҳтиёжни зўрлик ишлатиб ғайритабиий усулда қондириш» банди билан жиноят иши қўзғатилган.
16 октябрь куни ҳуқуқни муҳофаза қилувчи органлар томонидан у процессуал тартибда ушланган ва унга нисбатан қамоқ эҳтиёт чораси қўлланилган.
Ҳозирда мазкур воқеа бўйича тергов ҳаракатлари олиб борилмоқда.
Ижтимоий тармоқларда тарқалган маълумотларга кўра, 31 ёшли маҳкум мактабдан қайтаётган 3-синф ўқувчисини зўрлаган. Маълум бўлишича, бу шахс Фарғона вилоятилик бўлиб, 2018 йилда Жиноят кодексининг 118-моддаси 4-қисми (номусга тегиш) билан айбдор деб топилиб, 16 йилга озодликдан маҳрум этилган. У жазони умумий тартибдаги колонияда ўташи белгиланган эди.
Бироқ Жиноят ишлари бўйича Нишон туман судининг 2024 йилдаги ажрими билан унинг қолган 9 йил 2 ой жазо муддати манзил-колонияда ўташ учун ўзгартирилган. У ерда маҳкум Тошкент вилоятининг Оҳангарон туманида жойлашган корхонада ишлашга жалб этилган, шу ердан эса қочиб кетган.
Қонунга кўра, жинсий эҳтиёжни зўрлик ишлатиб, ғайритабиий усулда қондириш жинояти агар 14 ёшга тўлмаган шахсга нисбатан содир этилган бўлса, бу ҳолат учун 15 йилдан 20 йилгача озодликдан маҳрум қилиш жазоси белгиланган.
