Австралия ҳукумати Эрон аёллар терма жамоасининг беш нафар футболчисига гуманитар визалар берди. Бу қарор спортчиларга мамлакатда қолиш имконини беради ва уларнинг Эронга қайтишига тўсқинлик қилади. Сабаби, Осиё Кубоги доирасидаги ўйин олдидан улар миллий мадҳияни куйлашдан бош тортгани учун мамкалатда хавфга дуч келиши мумкин.
BBC News хабарига кўра, Австралия ички ишлар вазири Тони Берк футболчилар ҳозирда “хавфсиз жойга кўчирилгани”ни маълум қилган.
“Улар сиёсий фаоллар эмаслигини аниқ айтмоқчи. Улар шунчаки хавфсиз яшашни истаётган спортчилардир”, дейди вазир матбуот анжуманида.
Гуманитар виза олган футболчилар — Фотима Пасандиде, Заҳро Ганбари, Заҳро Сарбали, Атефе Рамазонизаде ва Мона Ҳамуди экани тасдиқланди.
Вазирнинг сўзларига кўра, Эрон терма жамоасининг бошқа футболчиларига ҳам гуманитар виза олиш имконияти борлиги ҳақида маълум қилинган. Ҳозирча уларга Австралияда қолишга рухсат берилган.
2 март куни Эрон аёллар терма жамоаси Австралияда ўтказилган Осиё Кубогидаги илк учрашувини ўтказган эди. Ўйин олдидан миллий мадҳиянинг янграши вақтида футболчилар жим турган, айримлари эса табассум қилган.
Спортчиларнинг бу ҳаракати Эрон ҳукуматига қарши норозилик сифатида қилинганми ёки Исроил ва АҚШнинг зарбаларига нисбатан муносабат сифатида амалга оширилганми – ҳозирча аниқ эмас. Бироқ Эронда бу ҳолат ҳукуматга қарши протест сифатида талқин қилинган.
Хусусан, давлат телеканалларидан бирининг бошловчиси Муҳаммад Ризо Шаҳбозий футболчиларни “уруш давридаги хоинлар” деб атаб, уларни “қатъий жазолаш”га чақирган.
Шундан сўнг ҳуқуқ ҳимоячилари ва мухлислар Австралия ҳукуматини спортчиларнинг хавфсизлигини таъминлашга чақирган. Чунки футболчилар учун Эронга қайтиш хавфли бўлиши мумкин.
Инсон ҳуқуқлари фаоли ва Австралия терма жамоасининг собиқ сардори Крейг Фостернинг таъкидлашича, кўплаб футболчиларнинг оилалари Эронда қолган, айримларининг эса фарзандлари ҳам бор. Унинг фикрича, ҳатто уларга Австралияда қолиш таклиф этилган тақдирда ҳам, айрим спортчилар оилавий сабабларга кўра бундан воз кечиши мумкин.
