Ерга сезиларли тезликда яқинлашаётган ZI/ATLAS кометаси сўнгги кунларда ёрқинлигини йўқотмоқда. Бу ҳақда Россия Космик тадқиқотлар институтига таяниб, “Интерфакс” хабар берди.
Қуёш астрономияси лабораторияси маълумотига кўра, кометанинг юлдуз катталиги (осмон жисмлари ёрқинлигининг асосий тавсифи) 10,1 дан 10,6 гача ўзгарган. Бу унинг олти кун аввалги ҳолатига нисбатан ёрқинлиги қарийб 63 фоизга камайганини англатади.
Бу бир оз ғалати кўринади, сабаби Ер билан масофа 10 миллион километрга қисқарган, лекин ёрқинлик пасайган. Мутахассислар асосий сабаб сифатида кометанинг аста-секин Қуёшдан узоқлашаётганини кўрсатмоқда.
Кометалар фақат Қуёш нури қайтганда ёрқин кўринади. Шу боис қуёш нурланишининг камайиши табиий равишда ёрқинликнинг пасайишига олиб келади. Бунга қўшимча равишда, астрономлар ички омилларни ҳам истисно қилмаяпти. Масалан, ядронинг тузилишидаги ўзгаришлар албедога таъсир қилиб, кўринадиган ёрқинликни пасайтириши мумкин.
Шунга қарамай, ZI/ATLAS ҳамон осмондаги энг кўзга ташланадиган кометалардан бири ҳисобланади. У кузатиш учун мавжуд юзлаб объектлар ичида тўртинчи ўринда турибди. Рейтингда биринчи ўринни C/2025 А6 (Леммон) кометаси эгаллаб турибди. У бир ой ичида қарийб ўн баравар хиралашган бўлса ҳам, ҳали ҳам нисбатан ёрқин.
ZI/ATLAS космик объекти биринчи марта 1 июлда аниқланган. Тадқиқотлар шуни кўрсатдики, у бошқа юлдуз тизимидан келган ва унинг ёши 7,5 миллиард йилдан ошади. У Қуёшдан тахминан 3 миллиард йил катта.
