АҚШнинг биринчи хоними Мелания Трамп кинопродюсерга айланади
АҚШнинг биринчи хоними Мелания Трамп ўзини кинопродюсер сифатида синаб кўришга қарор қилди. Маълум бўлишича, у Muse Films номли шахсий кинокомпаниясини ишга туширмоқда.
Ўзининг янги бизнес лойиҳаси ҳақида Дональд Трампнинг турмуш ўртоғи одатдаги шов-шувсиз, фақатгина ижтимоий тармоқдаги саҳифасида 10 сониялик қисқа видеоролик билан хабар берди.
Компания учун Muse Films номи бекorga танланмаган: айнан “Муза” (Muse) — Мелания Трампнинг Махфий хизмат ҳимоясида бўлганидаги код номидир.
Янги студиянинг биринчи лойиҳаси “Мелания” номли ҳужжатли фильм бўлади. Премьераси 2026 йил 30 январга белгиланган. Фильм дунё бўйлаб кинотеатрларда эксклюзив тарзда намойиш этилади.
Унинг тарқатиш ҳуқуқини Amazon MGM Studios студияси сотиб олган. Манбаларга кўра, битим қиймати 40 миллион долларни ташкил этган. Қизиғи шундаки, келишув Дональд Трампнинг президентликка иккинчи муддати бошланишидан бир кун олдин имзоланган, инаугурацияда эса Amazon асосчиси Жефф Безос ҳам иштирок этган.
Айни вақтда худди шу номга эга яна икки компания мавжуд — Amazon’нинг Европа филиали ва мустақил АҚШ студияси. Мелания Трамп компанияси улардан бири билан ҳамкорлик қиладими ёки тўлиқ мустақил фаолият юритадими — ҳозирча номаълум.
