Сурхондарё вилоятининг Жарқўрғон туманида ўз уйининг томорқасида жами 300 тупдан ортиқ бўлган гиёҳвандлик ўсимликлари парвариши билан шуғулланиб келаётган икки шахс қўлга олинди. Бу ҳақда Ички ишлар вазирлиги хабар қилди.
Қайд этилишича, жорий йилнинг 11 май куни Сурхондарё вилоятининг Жарқўрғон тумани Ички ишлар бўлими тезкор қидирув хизмати томонидан Жарқўрғон туманида ўтказилган тадбир давомида 1960 йилда туғилган, шу туманда яшовчи гумондор аёлнинг яшаш уйи ва ёрдамчи хўжаликлари холислар иштирокида кўздан кечирилган. Аниқланишича, мазкур шахс яшаш уйининг томорқа қисмида қуритилган 2 кг 905 грамм ҳамда 193 туп кўкнори гиёҳвандлик ўсимлигини парваришлаб келаётган бўлган. Тадбир иштирокчилари томонидан аниқланган ашёвий далиллар ҳужжатлаштириб олинган.
Бундан ташқари, Жарқўрғон туманида яна бир гиёҳвандлик воситасини етиштиришга оид ҳолат фош этилган. 11 май куни мазкур ҳудудда ўтказилган тадбир давомида 1941 йилда туғилган Жарқўрғон туманида яшовчи гумондорнинг яшаш уйи ва ёрдамчи хўжаликлари холислар иштирокида кўздан кечирилган ва уйнинг томорқа қисмида 117 туп кўкнори гиёҳвандлик ўсимлиги парваришлаб келинаётганлиги аниқланиб, тадбир иштирокчилари томонидан ашёвий далиллар ҳужжатлаштириб олинган.
Билдирилишича, ҳозирда мазкур икки ҳолат юзасидан терговга қадар текширув ҳаракатлари олиб борилмоқда.
