Германиянинг Audi автомобил компанияси АҚШнинг Жоржия штатида ўзининг илк заводини қуришни режалаштирмоқда. Лойиҳа учун қарийб 4,2 миллиард доллар сармоя ажратилади. Бу ҳақда АҚШ президенти Дональд Трамп 3 ноябрь куни бўлиб ўтадиган Конгресс сайловлари олдидан ўтказилган митингда маълум қилди.
Трамп митинг давомида Audi раҳбари Гернот Дёллнерни саҳнага таклиф қилди. Компания раҳбари АҚШ президентига кўрсатган ёрдами учун миннатдорлик билдирди.
Янги заводда йилига 200 мингтагача автомобил ишлаб чиқариш режалаштирилган. Асосан қимматбаҳо ва йирик йўлтанламаслар, жумладан, Audi Қ7, Қ8 ва Қ9 моделлари ишлаб чиқарилиши кутилмоқда.
Компания янги корхонада 4500 га яқин иш ўрни яратишни мўлжаллаган. Завод 2031 йилга бориб тўлиқ ишлаб чиқариш қувватига чиқиши керак.
Трампнинг бож сиёсати қарорга таъсир қилган
Аудиънинг АҚШда завод қуриш қарори Трампнинг савдо сиёсати билан ҳам боғлиқ. АҚШнинг импорт автомобилларга жорий этган божлари компанияга катта харажатлар келтирмоқда. Audi маълумотига кўра, ўтган йили ушбу божлар сабабли компания қўшимча 1,2 миллиард евро сарфлаган.
Ҳозиргача немис автомобил ишлаб чиқарувчиси АҚШ бозорига машиналарни асосан Европа ва Мексикадан етказиб келган.
Шу билан бирга, Audi АҚШдаги фаолиятини кенгайтириш фонида Германияда харажатларни қисқартиришда давом этмоқда.
Аввалроқ компания 2029 йил охиригача Германияда 7500 тагача иш ўрнини қисқартиришни режалаштирганини эълон қилганди.
ИГ Металл касаба уюшмаси Аудиънинг АҚШ бозорида ишлаб чиқаришни йўлга қўйиш режасини умумий маънода қўллаб-қувватлаган. Бироқ ташкилот Германиядаги заводлар ва ходимларнинг иш ўринлари сақланиши бўйича кафолат талаб қилган.
