Буюк Британия қироли Карл III нинг укаси Эндрю Маунтбаттен-Виндзор қироллик ҳукумати ҳужжатларини махфий равишда миллиардер Жеффри Эпштейнга юборган бўлиши мумкин. Бу ҳақда эълон қилинган файллардаги электрон хатларга асосланиб, Reuters хабар берди.
“Қиролнинг укаси Эндрю Маунтбаттен-Виндзор 2010 йилда Жеффри Эпштейнга расмий Британия савдо ҳужжатларини ва ҳукумат элчиси сифатида олган маълумотларини етказган”, дейилади агентлик хабарида.
АҚШ томонидан эълон қилинган ҳужжатларнинг сўнгги тўпламида электрон хатлар мавжуд бўлиб, улар Эндрю Эпштейнга Вьетнам, Сингапур ва бошқа мамлакатлар ҳақидаги ҳисоботларни юборганидан далолат беради. Ушбу ҳисоботлар собиқ шаҳзодага унинг ҳукумат элчиси сифатида қилган сафари муносабати билан юборилган. Қоидага кўра савдо вакилларига махфий ёки тижорат ҳужжатларини алмашиш тақиқланади.
Агентлик аниқлаштиришича, полиция Эндрюга нисбатан янги тергов бошланиши мумкинлиги ҳақидаги сўровга жавоб бермаган.
Аввалроқ Буюк Британия қироли Чарльз III нинг укаси Эндрю Маунтбеттен-Виндзор ўзининг ҳашаматли қароргоҳини тарк этгани хабар қилинганди. 2025 йилнинг октябрь ойида Чарльз Эндрюни унвонларидан маҳрум қилганди ва собиқ шаҳзоданинг Эпштейн билан давом этаётган алоқалари ҳақида янги тафсилотлар маълум бўлгач, уни кўчиришини айтганди. Шунингдек, қирол зўравонлик қурбонларига ҳамдардлигини билдирган.
АҚШ Адлия вазирлиги томонидан 30 январь куни эълон қилинган Эпштейн иши бўйича янги ҳужжатлар орасида Эндрю вояга етмаганларга қарши жиноятларда айбдор деб топилганидан кейин икки йилдан ортиқ вақт давомида Эпштейн билан мунтазам алоқада бўлганини кўрсатувчи электрон хатлар мавжуд. Словакия бош вазири маслаҳатчиси Эпштейнга алоқаси туфайли истеъфога чиққани хабар қилинганди.
30 январь куни АҚШ Адлия вазирлиги жинсий жиноятлар учун судланган ва қамоқда вафот этган Жеффри Эпштейн иши бўйича миллионлаб янги ҳужжатларни эълон қилди. Бу Эпштейн файллари шаффофлиги тўғрисидаги қонун қабул қилинганидан буён ошкор қилинган энг катта ҳажмдаги ҳужжатлар ҳисобланади.
