Эрон Мажлиси (бир палатали парламент) сўнгги воқеалар, жумладан музокара жараёни, шунингдек, мамлакатнинг мудофаа қобилияти ва миллий хавфсизлик соҳасидаги вазиятга бағишланган ёпиқ мажлис ўтказди. Бу ҳақда Меhr агентлиги таяниб хабар берди.
Мамлакат парламенти матбуот котиби Аббос Гударзининг маълумм қилишича, муҳокамаларда Қуролли кучлар Бош штаби бошлиғи генерал-маёр Абдулраҳим Мусавий ва ташқи ишлар вазири Аббос Арақчи иштирок этган.
Учрашувда аввалги музокаралардаги хатоларни такрорламаслик зарурлиги алоҳида таъкидланган. Шунингдек, Эроннинг уранни нол даражагача бойитишни қабул қилмаслиги қайд этилган.
“Депутатлар музокараларда қатъий туриш кераклигини ҳамда ядро саноатини ҳимоя қилиш дипломатияда муҳим масала бўлиши лозимлигини айтди. Бу соҳа мамлакат келажаги учун муҳим аҳамиятга эга”, дейди Аббос Гударзи. Шунингдек, Гударзи музокара жойи ва доирасини тўлиқ Эрон белгилаганини билдирган.
6 февраль куни АҚШ ва Эрон ўртасида Уммон воситачилигида музокараларнинг биринчи босқичи ўтказилди. Томонлар музокараларни ижобий баҳолаб, янги маслаҳатлашув ўтказишга келишиб олди, бироқ улар ўртасидаги келишмовчиликлар сақланиб қолди. Теҳрон уранни тўлиқ тақиқламасдан бойитиш бўйича келишувни кўриб чиқишга тайёрлигини билдирди, аммо ракета дастури бўйича музокаралар олиб боришни рад этди ва буни “мудофаа масаласи” деб таъкидлади. Трамп АҚШ учун мақбул битимнинг асосий шарти Эроннинг ядро қуролидан бутунлай воз кечиши эканлигини билдирди.
