Бельгия полицияси Брюсселдаги Европа комиссияси биноларида тинтув ўтказди. Бу ҳақда Deutsche Welle хабар берди.
Европа Иттифоқи Бош прокуратураси Еврокомиссия (ЕК) фаолияти юзасидан тергов бошлаган. Бунга 2024 йилда Европа комиссиясига тегишли 23 та бинонинг сотилиши сабаб бўлган. ЕК мазкур савдо белгиланган тартиб ва протоколларга мувофиқ амалга оширилганини маълум қилган. Ҳозирда комиссия тергов билан ҳамкорлик қилмоқда.
Financial Times газетаси ёзишича, 23 та бино Бельгиянинг SFPIM суверен фаровонлик жамғармаси томонидан 900 миллион еврога сотиб олинган. Европа комиссияси ушбу битим Европа кварталини замонавий, жозибадор ва экологик тоза ҳудудга айлантириш имконини беришини билдирган. Савдо очиқ тендер асосида ўтказилган. Еврокомиссия 2030 йилгача ўз офис майдонларини 25 фоизга қисқартиришни режалаштирмоқда.
Тергов ҳаракатлари бир нечта бўлимларда, жумладан Европа комиссиясининг бюджет департаментида ҳам ўтказилган. Эҳтимолий қоидабузарликлар Еврокомиссиянинг бюджет бўйича комиссари лавозимини Ёҳаннес Хан эгаллаган даврда (2019–2024) содир этилган бўлиши мумкин. У лавозимини тарк этгач, Европа Иттифоқининг Кипр бўйича махсус элчиси этиб тайинланган.
Маълумот ўрнида, декабрь ойида Европа прокуратураси Бельгия полицияси билан биргаликда Брюсселдаги Европа ташқи сиёсат хизмати (EEAS) офисида, Брюггедаги Европа коллежида, шунингдек Бельгиянинг турли ҳудудларидаги бир нечта хусусий уйда тинтув ўтказганди.
Ўшанда Европа дипломатиясининг собиқ раҳбари Федерика Могерини ҳам шу иш бўйича қўлга олинган эди. Тергов Европа Иттифоқи Дипломатик академиясини молиялаштириш бўйича тендер олишда фирибгарлик гумонлари, шунингдек, коррупция, ЕИ маблағларидан мақсадсиз фойдаланиш ва манфаатлар тўқнашуви эҳтимоли билан боғлиқ экани айтилган.
