Бугун, 15 июнга ўтар кечаси Россия қўшинлари Украина пойтахти Киевга кенг кўламли ҳаво ҳужумларини уюштирди. Ҳужум оқибатида UNESCO‘нинг Бутунжаҳон мероси рўйхатига киритилган Киев-Печерск лавраси ҳудудида йирик ёнғин юз берди. Бу ҳақда “Deutsche Welle” хабар берди.
Киев шаҳар ҳарбий маъмурияти раҳбари Темур Ткаченконинг маълум қилишича, лавра ҳудудида кучли ёнғин келиб чиққан. Шаҳар мэри Виталий Кличко эса ёнғин мажмуанинг асосий ибодатхонаси – Успенский собори том қисмида юз берганини билдирган.
Ҳужум оқибатида Киевнинг бир нечта туманларидаги турар жой бинолари ва фуқаролик инфратузилмаси зарар кўрган. Жумладан, Печерск туманидаги беш қаватли, Соломенский туманидаги тўққиз қаватли ҳамда Оболонь туманидаги турар жой биноларига зарба тегиб, айрим жойларда қисман қулаш ҳолатлари кузатилган. Шунингдек, Шевченко туманида бозор, озиқ-овқат дўкони ва кўп қаватли уй зарар кўрган.
Сўнгги маълумотларга кўра, ҳужум оқибатида камида 9 киши ҳалок бўлган, ўнлаб одам жароҳат олган.
Зарбалар оқибатида электр узатиш тармоқларига ҳам зарар етган ва Киевдаги 140 мингга яқин абонент электр таъминотисиз қолган.
Россиянинг тунги ҳужумлари Украинанинг бошқа ҳудудларини ҳам қамраб олган. Харьков шаҳрида аввалги зарба оқибатидаги ёнғинни ўчиришга келган қутқарувчиларга такрорий ҳужум уюштирилиши ортидан 5 нафар қутқарувчи ҳалок бўлган, яна камида 5 киши жароҳат олган.
