Португалия терма жамоаси ва Саудия Арабистонининг “Ал-Наср” клуби ҳужумчиси Криштиану Роналдунинг биологик ёши 28 да экани маълум бўлди. Бу ҳақда 2026 йилги Жаҳон чемпионати олдидан Американинг WHOOP компанияси эълон қилди.
Роналду тайёргарлик жараёнида ўзининг уйқу, тикланиш ва умумий жисмоний кўрсаткичларини назорат қилиш мақсадида WHOOP компанияси билан ҳамкорлик қилмоқда. “Ал-Наср”нинг 40 ёшли ҳужумчиси велосипеддаги куч синови видеосини эълон қилганидан бир кун ўтиб, WHOOP унинг биологик ёши 12 йилга “кичик” экани, 28 ёш деб баҳоланганини билдирди.
Компаниянинг маълум қилишича, Роналдунинг танаси уйқу, тикланиш, ишлаш ва узоқ умр учун оптимал ҳолатда, шунингдек, у элита даражадаги метаболик назоратга эга. Бу мушакларни тўлдириб туради, энергияни барқарор ушлаб туради ва қаришни секинлаштиради.
23 йиллик фаолияти давомида 954 та гол урган беш карра “Олтин тўп” соҳиби АҚШ, Канада ва Мексикада бўлиб ўтадиган ЖЧ-2026 га пухта тайёрланмоқда. Роналду ушбу турнирда Лионель Месси билан биргаликда тарихда олти марта Жаҳон чемпионатида майдонга тушган кам сонли футболчилардан бирига айланиши мумкин.
