Бугун, 25 февраль куни Фарғона вилоятининг Қўқон шаҳридаги кўп қаватли уйлардан бирида газ-ҳаво аралашмаси чақнади. Бу ҳақда вилоят Фавқулодда вазиятлар бошқармаси хабар берди.
Қайд этилишича, соат 14:47 да Фарғона вилояти ФВБга “112” тизими орқали Қўқон шаҳар “Бўстон” МФЙда жойлашган кўп қаватли уйлардан бирида чақнаш содир бўлиб, унинг оқибатида ёнғин чиққани тўғрисида хабар тушган.
Хабарга асосан, қутқарув бўлинмалари айтилган манзилга етиб борган ҳамда ёнғин тезкорлик билан бартараф этилган.
Айни дақиқалардаги маълумотга кўра, тан-жароҳати олганлар тўғрисида хабар тушмаган. Ҳозирда ФВВ қутқарувчилари томонидан ҳодиса оқибатларини бартараф этиш ишлари олиб борилмоқда.
“Вазият тўлиқ Фарғона вилояти ФВБ назоратида. Қўшимча маълумот тақдим этилади”, дейилади хабарда.
