Тошкентда 3,5 млн долларлик кредит чиқариб бериш учун қарийб 420 минг доллар талаб қилган банк ходими ҳамда фуқаро қўлга олинди. Бу ҳақда Давлат хавфсизлик хизмати хабар берди.
Маълум қилинишича, ДХХ ва Бош прокуратуранинг Иқтисодий жиноятларга қарши курашиш департаменти ҳамкорлигида Тошкент шаҳрида тезкор тадбир ўтказилган. Унда кредит ажратиш билан боғлиқ ноқонуний ҳолат фош этилган.
Жумладан, хусусий акциядорлик тижорат банкларидан бирининг Олмазор филиали банк хизматлари маркази юристи ва Тошкент вилоятининг Янгийўл туманида яшовчи 1979 йилда туғилган, муқаддам судланган шахс ўзаро тил бириктириб, тадбиркорлик билан шуғулланмоқчи бўлган фуқаронинг ишончига кириб олган.
Шунингдек, улар мазкур фуқаронинг номига 3,5 миллион АҚШ доллари миқдорида имтиёзли кредит ажратиб беришларини айтган ҳамда “холис” хизматлари эвазига кредит суммасининг 12 фоизини, яъни 420 минг АҚШ доллари талаб қилган. Ушбу сўралган пулдан бир 50 минг долларини олдиндан олган вақтларида мазкур шахслар ашёвий далиллар билан ушланган.
Билдирилишича, ҳозирда уларга нисбатан жиноят иши қўзғатилиб, қамоқ эҳтиёт чораси қўлланилган ҳамда тергов ҳаракатлари олиб борилмоқда.
