Бугун, 29 июль куни Ўзбекистон Республикаси Президенти Шавкат Мирзиёев Остона шаҳрида “Келажак ўйинлари” учинчи халқаро мусобақасининг тантанали очилиш маросимида иштирок этди. Бу ҳақда Президент матбуот хизмати хабар берди.
Қайд этилишича, “Барис Арена” муз саройида ўтказилган тадбирда Қозоғистон Республикаси Президенти Қосим-Жомарт Тўқаев, Қирғиз Республикаси Президенти Садир Жапаров, Тожикистон Республикаси Президенти Имомали Раҳмон ва бошқа хорижий меҳмонлар ҳам қатнашган.
Маросим иштирокчиларига Россия Федерацияси Президенти Владимир Путин видеомурожаат йўллаган.
Тадбирнинг тантанали қисмида фижитал спортнинг мазмун-моҳияти, яъни рақамли беллашувларни анъанавий спорт турлари ҳамда жисмоний фаоллик билан бирлаштирувчи йўналишлари ҳақида маълумот берилган. Мусобақанинг ғояси ёшларни анъанавий спорт билан шуғулланишга даъват этишдир.
Давлат раҳбари халқаро турнир иштирокчиларини қутлаган.
Бугун спорт ва технологиялар вазирлари, дипломатик миссиялар раҳбарлари ҳамда бошқа юқори мартабали вакиллар иштирокида фижитал спорт бўйича саммит ҳам бўлиб ўтган.
Биринчи “Келажак ўйинлари” 2024 йилда Қозон шаҳрида ўтказилган. Унинг очилиш маросимида Ўзбекистон Президенти Шавкат Мирзиёев иштирок этган эди. Иккинчи турнир эса 2025 йилда Абу-Даби шаҳрида бўлиб ўтган.
Бу галги мусобақаларда Ўзбекистон вакиллари фижитал футбол, лазертаг ва рақс йўналишлари бўйича беллашади.
