Кремль АҚШ тақдим этган Украина бўйича тинчлик режасини жамоатчилик олдида оммавий баёнотлар билан кенг муҳокама қилиш ниятида эмас. Бу ҳақда Россия президенти матбуот котиби Дмитрий Песков маълум қилди.
Песков Москванинг музокараларга тайёр эканини, бироқ бу жараён “мегафон орқали” бўлмаслигини таъкидламоқда.
“Шундай мураккаб масалада мегафон орқали музокара қилишимизни хоҳлаяпсизми? Биз тинчлик музокаралари жараёни учун эмас, балки муваффақиятли тинчлик музокаралари учун очиқмиз. Музокараларнинг чиндан ҳам муваффақиятли бўлишини истаймиз. Шунинг учун биз буни мегафон орқали муҳокама қилишга тайёр эмасмиз”, деган у.
“Расмий маълумот келиб тушмаган”
Песковнинг қўшимча қилишича, Москва ҳали ушбу режани АҚШдан расман қабул қилиб олгани йўқ.
“Биз эҳтимолий ўзгаришлар ҳақида биламиз, аммо Москвага расман ҳеч нарса келиб тушгани йўқ. Бу ҳақда матбуотдан ўрганмоқдамиз. Ҳозирча ҳеч қандай аниқ муҳокама кетмаяпти. Биз мулоқотга очиқлигимизча қоламиз”, деган у.
Бундан олдин Россия Ташқи ишлар вазирлиги вакили Мария Захарова ҳам Россияга АҚШдан расмий равишда ҳеч қандай маълумот келиб тушмаганини айтган ва Москва мулоқотга очиқ эканини қайд этган эди.
АҚШ президенти Дональд Трамп томонидан илгари сурилаётган Россия-Украина тинчлик режаси 21 ноябрь куни украиналик депутат Алексей Гончаренко томонидан эълон қилинган. Режа 28 банддан ташкил топган.
Зеленскийга мурожаат
Песков Россия Қуролли Кучларининг самарали ҳаракати Украина президенти Владимир Зеленскийни келишувга кўндиришга ёрдам беришини таъкидлаган.
“Бу Зеленскийни масалани тинч йўл билан ҳал қилишга мажбурлашга уринишдир. Буни давом эттириш хавфли. Режим масъулиятли қарор қабул қилиши, буни айнан ҳозир қилиши ва масъулиятни ўз зиммасига олиши керак”, деган Песков.
