Қорақалпоғистонда Besqala Mining Valley махсус майнинг зонасини ташкил этилади. Бу ҳақда президентнинг 20 апрелда кучга кирган қарорида белгиланди.
Ҳужжатда қайд этилишича, Қорақалпоғистон Республикасига инвестицияларни жалб қилиш, аҳоли фаровонлигини ошириш, майнингни амалга ошириш учун қулай шарт-шароитлар яратиш орқали қайта тикланувчи энергия манбаларидан самарали фойдаланиш мақсад қилинган. Қарорга кўра, махсус зонанинг ҳудуди Қорақалпоғистон Республикасининг бутун ҳудуди ҳисобланади.
Махсус зона доирасида қуйидагиларга рухсат берилади:
- майнингни амалга ошириш учун ягона электр энергетика тизимида ва барча турдаги қайта тикланувчи энергия манбаларидан, шунингдек, водород электр станциясида ишлаб чиқарилган электр энергиясидан фойдаланишга;
- майнинг натижасида олинган криптоактивлар белгиланган тартибда миллий криптобиржалар ёки хорижий платформалар орқали, шу жумладан, тўғридан-тўғри шартномалар асосида сотилишига ва (ёки) уларни бошқа ликвидли криптоактивларга айирбошлашга;
- майнинг натижасида олинган (шу жумладан, бошқа юқори ликвидли криптоактивларга айирбошланган) криптоактивларни сотишдан тушган тушумни мажбурий тарзда Ўзбекистондаги банкларнинг ҳисобварақларига ўтказишга;
- фақатгина Қорақалпоғистон Республикаси ҳудудида давлат рўйхатидан ўтган ҳолда фаолият юритаётган юридик шахслар резидент бўлишига;
- резидентларга майнинг амалга ошириш натижасида ҳосил бўладиган иссиқлик энергияси ҳисобидан қишлоқ хўжалигига мўлжалланган ер участкаларида белгиланган тартибда иссиқхоналар ташкил этишга.
“Besqala Mining Valley махсус майнинг зонаси дирексияси” ташкил этилади. Истиқболли лойиҳалар миллий агентлиги майнинг фаолиятини амалга ошириш учун рухсатномалар бериш бўйича ишчи орган этиб белгиланди. Талабгорлар (юридик шахслар) махсус зона резидентлигини ва майнинг фаолиятини амалга ошириш учун рухсатнома олиш тўғрисида ариза билан дирексияга мурожаат қилади. 2035 йил 1 январга қадар резидентларнинг майнинг фаолиятини амалга ошириш билан боғлиқ операциялардан олинган даромадлари солиқлар ва йиғимлардан озод қилинади.
Қорақалпоғистонда майнингга ихтисослашган махсус зона ташкил этилиши “Қорақалпоғистон Республикасини ижтимоий-иқтисодий ривожлантиришга қаратилган чора-тадбирларни янада жадаллаштириш тўғрисида”ги президент қарорида ҳам белгиланди.
Майнинг — ҳисоблаш операцияларини бажариш орқали маълумотларнинг тақсимланган реестрини юритиш, блокларнинг яхлитлигини яратиш ва тасдиқлаш фаолияти. Майнинг фақат юридик шахс томонидан қуёш фотоэлектр станциялари орқали ишлаб чиқарилган электр энергиясидан фойдаланган ҳолда амалга оширилади, қонунчилик ҳужжатларида назарда тутилган ҳоллар бундан мустасно.
2023 йилнинг октябрида майнинг фаолиятини амалга ошириш учун рухсатнома бериш тартиби тўғрисидаги низом тасдиқланган. Майнингни рухсатномасиз амалга ошириш тақиқланади.
