Шимолий Корея етакчиси Ким Чен Ин 19 апрель куни қизи билан бирга баллистик ракеталарнинг синов жараёнини кузатди. Бу ҳақда Reuters хабар берди.
Мазкур синовлар кассетали ва парчаланувчи жанговар каллакларнинг самарадорлигини баҳолашга қаратилган. Бу Пхеньян томонидан апрель ойидаги тўртинчи, 2026 йил бошидан буён эса еттинчи ракета синовидир. Шимолий Корея БМТ Хавфсизлик Кенгаши резолюцияларига қарамай, ўзининг ракета-ядро салоҳиятини оширишда давом этмоқда.
Машғулотлар давомида модернизация қилинган Ҳвасонг-11 Ра русумли бешта қисқа масофали тактик баллистик ракета учирилган. Улар тахминан 136 километр узоқликдаги оролда жойлашган нишонга йўналтирилган ва 12,5–13 гектар майдонни юқори аниқликда зарарлаган.
Жанубий Корея томони ракеталар шарқий соҳилдаги Синпо шаҳри яқинидан учирилганини тасдиқлади ва Пхеньянни бундай “провокацияларни” зудлик билан тўхтатишга чақирди. Ким Чен Ин синов натижаларидан мамнунлигини билдириб, махсус илмий гуруҳнинг кўп йиллик меҳнати ўз самарасини берганини таъкидлади.
Эълон қилинган суратларда Ким Чен Ин ва унинг қизи Жу Аэ ҳарбий амалдорлар ҳамроҳлигида жараённи кузатаётгани акс этган. Жу Аэ аввал ҳам отаси билан бир неча бор ракета ва танк синовларида қатнашган. Жанубий Корея разведкаси уни КХДР етакчисининг эҳтимолий вориси сифатида кўради.
