Шимолий Корея 7 ноябрь куни шарқий қирғоқлари томон баллистик ракета учирди. Бу ҳақда Жанубий Корея ва Япония маълумотларига таяниб, Reuters хабар берди.
Қисқа масофали баллистик ракета Хитой чегарасига яқин ҳудуддан учирилган. У тахминан 700 километр масофани босиб ўтган. Ҳодиса АҚШ мудофаа вазири Пит Ҳегсетнинг хавфсизлик музокаралари учун Жанубий Кореяга ташрифидан атиги бир неча кун ўтиб содир бўлди.
Жанубий Корея ва АҚШ кузатув тизимлари парвозни олдиндан аниқлаб, жараённи кузатиб борган. Маълумотлар Япония билан ҳам бўлишилган. Ўз навбатида, Япония ҳукумати Шимолий Корея баллистик ракета учиргани ҳақида хабар берган. Унга кўра, ракета мамлакатнинг иқтисодий ҳудудидан ташқарига тушган.
АҚШ президенти Дональд Трамп ўтган ҳафта Жанубий Кореяга ташриф буюриб, Шимолий Корея етакчиси Ким Чен Ин билан учрашишга тайёр эканини айтганди. Учрашув ўтказилмади, бироқ Трамп Ким билан учрашиш учун минтақага қайтишга тайёрлигини билдирди. У 2019 йилда президентликнинг биринчи муддатида Жанубий ва Шимолий Корея ўртасидаги Панмунжом қишлоғида Ким билан учрашган эди.
Ким Чен Ин Трампнинг сўнгги таклифларига жавоб бермаган, аммо илгари АҚШ президенти билан учрашувни “ёқимли хотира” сифатида эслаган. У Вашингтон ядро қуролидан воз кечишни талаб қилишни тўхтатса, музокаралардан қочиш учун сабаб йўқлигини айтган.
Ўтган ой Шимолий Корея бир нечта қисқа масофали баллистик ракеталарни синовини ўтказган. Бу воқеа Трамп ва Хитой раҳбари Си Цзиньпиннинг Жанубий Кореяга саммит доирасидаги ташрифи арафасида содир бўлган.
