Тошкентда чиройли рақамлардан ташкил топган ID-карта расмийлаштириб бериш эвазига фуқародан пул талаб қилган ходим қўлга тушди. Бу ҳақда ИИВ Жамоат хавфсизлиги департаменти хабар қилди.
Қайд этилишича, пойтахтда яшовчи фуқаро Ички ишлар вазирлиги Шахсий хавфсизлик бошқармасига ариза билан мурожаат қилиб, Шайхонтоҳур тумани Ички ишлар органлари фаолиятини мувофиқлаштириш бошқармаси фуқароликни расмийлаштириш бўлими ходими ундан чиройли рақамлардан иборат ID карта олиб бериш эвазига 1,5 минг доллар талаб қилганини билдирган.
Ўтказилган тезкор тадбирда собиқ ходим келишилган пуллардан минг доллар қисмини олган вақтида ашёвий далиллар билан ушланган.
Ҳолат юзасидан Жиноят кодексининг тегишли моддаси билан иш очилиб, тергов ҳаракатлари ўтказилмоқда.
