Time журнали Леонардо Ди Каприога 2025-йилнинг “Энг яхши актёри” унвонини тақдим этди. Нашрнинг таъкидлашича, ўттиз йиллик фаолиятига қарамай, Ди Каприо ҳануз замонамизнинг энг таниқли, машҳурлиги йўқолмаган актёрларидан бири бўлиб қолмоқда. Унинг экрандаги жозибаси эса томошабинларни ҳеч қачон чарчатмайди, балки аксинча, вақт ўтган сари актёрга бўлган қизиқиш янада ортиб бормоқда.
Пол Томас Андерсоннинг янги “Жанг ортидан жанг” фильми актёрнинг навбатдаги йирик ижодий ютуғи бўлди. Унда Ди Каприо ҳаётда кўпни кўрган, дунё идеалларидан чарчаган, қизи билан муносабатларни қайта тиклашга уринаётган мураккаб характер Боб Фергюсон образини гавдалантирган. Фильм аллақачон 200 миллион доллардан зиёд даромад йиғди ва танқидчилар ҳамон уни фаол муҳокама қилмоқда. Кулгили, фожеавий ва ҳатто бир оз абсурд руҳдаги бу ҳикоя Ди Каприонинг истеъдодини яна бир бор очиб берди.
Актёр ўз фаолияти давомида “Омон қолган” фильмидаги роли учун “Оскар”ни қўлга киритган, шунингдек, BAFTA, “Олтин глобус”, “Кумуш айиқ” каби йирик мукофотлар билан тақдирланган. Аммо унинг ижод йўли бундан анча аввал бошланган: 1993-йилда у Роберт Де Ниро билан “Бу йигитнинг ҳаёти” драмасида илк бор катта экранда кўриниш берган. Орадан бир йил ўтгач эса “Гилберт Грэйпни нима қийнайди?” фильмидаги роли учун илк “Оскар” номинациясини қўлга киритган.
Актёрнинг кейинги фильмографияси эса кино тарихидаги энг машҳур лойиҳалар билан тўлган: “Ромео ва Жулетта”, “Титаник”, “Авиатор”,“Буюк Гетсби”, “Уолл стрит бўриси,” “Бир куни Голливудда” ва ҳоказо. Ди Каприо ҳар сафар юрагида қарама-қарши ҳислар тўқнашган қаҳрамонларни танлайди. Шу боис у романтик ролларни ҳам, мураккаб, ахлоқий жиҳатдан зиддиятли образларни ҳам тенг даражада ишонарли ижро этади.
Режиссёр Пол Томас Андерсон актёрнинг ижодий интизомига ҳам юқори баҳо беради:
“Агар юқори даражадаги машҳур актёр бўлсангиз, сизнинг ҳаракатларингиз барча жараёнга таъсир қилади. У билан ишлаш доимо қулай, тинч, шошқалоқликсиз ва ортиқча муаммоларсиз кечади. Ди Каприо суратга олиш майдонида пайдо бўлиши билан бутун атмосфера ўзгаради”, дейди режиссёр.
Леонардонинг ўзи эса томошабинларга кўрсатишга арзийдиган бирор рол бўлгандагина кинода пайдо бўлишни афзал кўради. Бошқа ҳолатларда шов-шувдан четда қолишни маъқул кўради.
Time’нинг актёрга берган янги унвони шуни кўрсатадики, узоқ йиллик карьерасига қарамай, Ди Каприо томошабинлар эътиборини ушлаб тура олган камёб актёрлардан бири бўлиб қолмоқда.
