Наманган вилоятининг Давлатобод туманида аёл ва унинг жазмани томонидан қасддан одам ўлдириш билан боғлиқ жиноятнинг олди олинди. Бу ҳақда Ички ишлар вазирлиги ахборот хизмати хабар берди.
Маълум қилинишича, 4 март куни Давлатобод туманида яшовчи аёл ўзининг жазмани билан олдиндан тил бириктириб, шаръий никоҳ асосида бирга яшаб келган турмуш ўртоғини 6 минг доллар эвазига ўлдиртиришни режалаштиргани ҳақида тезкор маълумот олинган.
Шундан сўнг вилоят Ички ишлар бошқармаси, Давлат хавфсизлик хизмати ҳамда прокуратура ходимлари ҳамкорлигида тезкор тадбир ўтказилган. Буюртмачилар Telegram орқали шартли қотил билан боғланиб, эркакни Cobalt автомобилида ёлғиз юрган пайтда Андижон—Наманган йўлидаги овлоқ ҳудудда ўлдириш, сўнг автомобилни ёқиб юбориш бўйича кўрсатма берган.
Тадбир давомида жабрланувчининг ўлдирилгани саҳналаштирилиб, ушбу ҳолат видеога олиниб буюртмачиларга кўрсатилган. Шундан сўнг улар келишилган пул маблағидан 5,5 минг долларни бераётган вақтида тезкор ходимлар томонидан ашёвий далиллар билан қўлга олинган.
Мазкур ҳолат юзасидан Наманган вилояти прокуратураси томонидан Жиноят кодексининг 25-моддаси орқали 97-моддаси иккинчи қисми билан жиноят иши қўзғатилган. Гумонланувчилар Жиноят-процессуал кодексининг 221-моддаси тартибида ушланган бўлиб, ҳозирда дастлабки тергов ҳаракатлари олиб борилмоқда.
