Тошкент вилоятининг Ангрен шаҳрида саккиз ёшли бола дайди итлар ҳужумига учраб вафот этгани айтилмоқда. Бу ҳақда “Миллар” репортажида маълум қилинди.
Маълум бўлишича, бола онаси билан Ангрен шаҳридаги маҳаллалардан бирида ижарада яшаб келган. Дастлабки маълумотларга кўра, у мактабдан қайтаётган вақтида кўчадаги бир гуруҳ дайди итлар ҳужумига учраган. Маҳаллий фуқароларнинг айтишича, ҳудудда дайди итлар муаммоси бир неча йилдан бери сақланиб қолган ва улар болалар ҳамда катталарга тез-тез ташланиб туради.
Маҳалла фуқароларининг сўзларига кўра, боланинг онаси фарзанди мактабдан вақтида қайтмагач, уни қидиришга чиққан. Шундан сўнг бола кўчада жароҳатланган ҳолда топилгани айтилмоқда. Айрим маълумотларга кўра, у шифокорлар етиб келгунига қадар вафот этган.
Ҳолат юзасидан Ангрен шаҳри “Истиқлол” маҳалла фуқаролар йиғини раиси ҳам муносабат билдириб, оила ҳудудда вақтинчалик ижарада яшаб келганини маълум қилган. Унинг айтишича, воқеа ҳақида хабар олингач, масала шаҳар ҳокими ва масъул ташкилотлар назоратига олинган ҳамда бундай ҳолат такрорланмаслиги учун чоралар кўрилмоқда.
Тошкент вилояти Ички ишлар бош бошқармаси ахборот хизмати вакиллари эса ҳодиса юзасидан яқин вақт ичида расмий муносабат билдирилишини маълум қилган.
