Тошкент шаҳри Янгиҳаёт туманида хонадонида жами қиймати 1 млрд 100 млн сўмдан ошиқ тиббий буюмларни ноқонуний равишда сақлаб келган шахс аниқланди. Бу ҳақда Божхона қўмитаси хабар қилди.
Маълум қилинишича, “Тошкент-АЭРО” Контрабандага қарши курашиш шуъбаси, Давлат хавфсизлик хизмати ва Ички ишлар идоралари вакиллари билан тезкор тадбир ўтказилган. Унда олдиндан шубҳа остига олинган шахснинг Янгиҳаёт туманидаги хонадони белгиланган тартибда ва холислар иштирокида кўздан кечирилганида 38 номдаги 3 613 турдаги тиббий буюмлар ноқонуний равишда сақланаётгани фош бўлган.
Олиб қўйилган тиббий буюмлар мураккаб жарроҳлик амалиётларида қўлланиладиган стент, катетер ва яна бошқа турдаги буюмлар инсон ҳаёти учун жуда муҳим ва шу билан бир қатор юқори хавф гуруҳига кирувчи буюмлар ҳисобланади.
“Сифати кафолатланмаган стентнинг қон томири ичида тўғри ишламаслиги хасталикни кучайтириши, бемор организмига мос келмаслиги, аллергик реакциялар, тромб ҳосил бўлиши ёки ҳатто инфарктга олиб келиши мумкин. Қолаверса, махсус шароитларда ташилиши ва сақланиши талаб этиладиган тиббий буюмларнинг оддий хонадонда сақланишини ҳеч нарса билан оқлаб бўлмайди”, дейилади божхона хабарида.
