Колумбия ва Португалияга қарши учрашувлардаги мағлубиятлардан сўнг “Opta” аналитика компаниясининг суперкомпьютери Ўзбекистоннинг 2026 йилги Жаҳон чемпионати плей-оффига чиқиш эҳтимолини ўрганиб чиқди. Бу ҳақда компаниянинг расмий сайтида маълум қилинди.
Янгиланган прогнозга кўра, Ўзбекистон терма жамоасининг ўз гуруҳида биринчи ўринни эгаллаш эҳтимоли 0 фоизни ташкил этмоқда. Терма жамоанинг плей-офф босқичига чиқиш имконияти эса 1,65 фоиз деб баҳоланган.
“Opta” ҳисоб-китобларига кўра, Ўзбекистоннинг нимчорак финалга етиб бориш имконияти 0,31 фоизга тенг. Шунингдек, жамоанинг чорак финалга чиқиш эҳтимоли 0,06 фоиз деб кўрсатилган.
Ўзбекистон миллий терма жамоасининг ярим финалга йўл олиши, финалга чиқиши ва жаҳон чемпиони бўлиш эҳтимоли 0 фоизни ташкил этган.
Жаҳон чемпионатининг 3-турида Ўзбекистонга қарши майдонга тушадиган Конго ДР терма жамоасининг 1/32 финал босқичига чиқиш имкониятлари 41,22 фоизни ташкил қилмоқда.
Ҳисоб-китобларга кўра, Аргентина терма жамоасини Жаҳон чемпионатининг асосий фаворити деб баҳоламоқда. Амалдаги чемпионларнинг турнирда ғолиб чиқиш эҳтимоли 15,46 фоизни ташкил этмоқда. Кейинги ўринлардан Франция (15,06 фоиз) ва Испания (12,48 фоиз) жой олган.
Турнир бошланишидан олдин “Opta” Испанияни асосий фаворит сифатида кўрсатган эди. Унинг чемпионлик эҳтимоли – 16,1 фоиз деб баҳоланган. Бироқ испанлар 1-турдаги муваффақиятсизликдан сўнг 12,48 фоиз кўрсаткич билан учинчи ўринга тушиб қолган.
Элатиб ўтамиз, Фабио Каннаваро бошчилигидаги Ўзбекистон терма жамоаси Жаҳон чемпионатидаги илк учрашувида Колумбияга 1:3, иккинчи учрашувда эса Португалияга 0:5 ҳисобида мағлубиятга учраганди.
