АҚШ Адлия вазирлиги Исроил тарафдори бўлган амалдорга хизмат кўрсатишни рад этишини эълон қилган Нью Йоркдаги қаҳвахоналар тармоғига нисбатан фуқаролик ҳуқуқлари бузилиши бўйича текширув бошлади. Бу ҳақда Al Jazeera хабар берди.
Гап ўзбекистонлик тадбиркор Парвиз Муҳаммадқулов асос солган Poetica Cоffее тармоғи ҳақида кетмоқда. Мазкур қаҳвахона АҚШда жами еттита филиалга эга. АҚШ Вакиллар палатаси аъзоси Ден Голдман ва унинг қизи 22 июнь куни қаҳвахонанинг Бруклиндаги филиалларидан бирига ташриф буюрган. Мазкур ташриф ортидан Poeticа Cоffее ўзининг Instagram ва Facebook саҳифаларига қуйидагича пост жойлаштирган:
Конгрессмен Ден Голдман, бугун қаҳва ичиш учун дўконимизга кирганингизни кўрдик. Унинг таъми геноцид шарбатига ўхшамаслигини кўрдингизми ёки ҳали ҳам фарқига боролмаяпсизми? Биз Poetica’да ирқчиларга, фашистларга, гомофобларга, геноцидга кўмаклашувчиларга ёки уларга ўхшаш бошқаларга хизмат кўрсатмаймиз. Афсуски, сизни дарҳол таний олмадик, акс ҳолда сизни ортингизга қайтарган бўлардик. Пулингизни (9,82 доллар) қайтардик, улар бизга керак эмас, дейилган Ден Голдман сурати акс этган постда.
АҚШ Адлия вазирлигининг фуқаролик ҳуқуқлари бўйича бош прокурори Ҳармит К. Диллион мазкур пост ортидан қаҳвахонага нисбатан суриштирув ўтказишга буйруқ берганини айтди.
“Бу ҳаракатлар нафақат қораланади, балки ноқонуний бўлиши мумкин. Фуқаролик ҳуқуқлари департаменти текширув бошлади ва агар асослар топилса, қонуний чоралар кўради”, деди у.
Голдман эса CNN телеканалига берган интервьюсида воқеадан афсусда эканини билдирди. Аммо бу воқеа фуқаролик ҳуқуқлари бўйича федерал терговни талаб этмаслигини айтди. Голдман Демократик партия ичида Исроилнинг фаол тарафдори сифатида танилган. У жорий сайлов даврида Исроил тарафдори бўлган номзодларни қўллаб-қувватловчи Америка Исроил жамоат ишлари қўмитаси (АIPАC) ва унга алоқадор гуруҳлардан қарийб 195 минг доллар миқдорида сайловолди хайрияларини олган. Голдман Исроилнинг Ғазода геноцид содир этаётгани ҳақидаги маълумотларни рад этиб келган, бироқ сектордаги вазиятни “даҳшатли” деб таърифлаган.
