Кеча, 30 ноябрь куни Қозоғистоннинг Ақтўбе вилоятида ичида 54 нафар Ўзбекистон фуқароси бўлган йўловчи автобуси йўл-транспорт ҳодисасига учради. Бу ҳақда Ўзбекистон Республикасининг Ақтау шаҳридаги Бош консуллиги хабар берди.
Қозоғистон Республикасининг ваколатли идоралари маълумотига кўра, соат 21:00 да “Россия Федерацияси – Ақтўбе – Қизилўрда – Олмаота” республика аҳамиятига эга автомобиль йўлида “Москва – Тошкент” йўналиши бўйлаб ҳаракатланиб келаётган, давлат рақами 774BOT13 бўлган VanHool русумли йўловчи автобуси йўл-транспорт ҳодисасига учраган.
Ҳодиса вақтида автобусда 54 нафар Ўзбекистон Республикаси фуқароси бўлган. ЙТҲ оқибатида жабрланувчи ва ҳалок бўлганлар йўқ. Барча йўловчилар фавқулодда вазиятлар хизмати ва полиция ходимлари томонидан Ақтўбе вилояти Айтекеби тумани, Қорабутоқ қишлоғидаги масжидга вақтинча жойлаштирилган. Фуқароларга озиқ-овқат ва зарур ёрдамлар кўрсатилмоқда.
“Фуқароларни Ўзбекистонга бошқа автобус орқали тезкор равишда қайтариш чоралари кўрилмоқда. Вазият Ўзбекистоннинг Қозоғистондаги элчихонаси ва Бош консуллиги томонидан тўлиқ назоратга олинган бўлиб, Қозоғистон томонининг масъул идоралари билан доимий алоқа ўрнатилган”, дейилади хабарда.
