Яқин Шарқ минтақасида кескинлик кучайганидан сўнг Доҳада қийин аҳволга тушиб қолган 91 нафар Ўзбекистон фуқароси Қатар туризм ташкилоти билан келишилган ҳолда муносиб уй-жой билан таъминланди, деб хабар берди “Дунё” ахборот агентлиги.
Маълум қилинишича, 4 март куни Ўзбекистон элчихонаси вакиллари турли сабабларга кўра Қатарда бўлиб турган ватандошлар ҳолидан хабар олиб, уларга зарур амалий ва ахборот кўмагини кўрсатди. Элчи Ашраф Хўжаев Доҳа портига ташриф буюриб, Cеlestine cruises кемасида бўлган 71 нафар ўзбекистонлик билан учрашди. Суҳбат давомида уларга юзага келган вазият ҳақида батафсил маълумот берилди. Хусусан, Ўзбекистон ҳукумати Қатарнинг тегишли идоралари билан ҳамкорликда ватандошлар хавфсизлигини таъминлаш ҳамда вазиятдан келиб чиқиб уларни Ўзбекистонга қайтариш механизмларини ишлаб чиқаётгани таъкидланди.
Элчихона вакиллари Grand Regal, Hampton, Jouri Аl Мurwаb ва Retaj Аl Rayyan меҳмонхоналарига ташриф буюриб, у ерларда вақтинча истиқомат қилаётган фуқаролар ҳақида аниқ маълумот тўплаб, уларнинг рўйхатини шакллантирди. Таъкидланишича, бу эҳтимолий эвакуация ёки бошқа ташкилий чораларни мувофиқлаштиришда муҳим аҳамият касб этади.
Айни пайтда Қатар ҳаво ҳудуди ёпиқлигича қолмоқда. Мамлакатда бўлиб турган хорижий сайёҳлар қўшимча расмий маълумот берилишини кутишмоқда.
Яқин Шарқ минтақасида кескинлик кучайганидан сўнг 28 февралдан бошлаб Ўзбекистон шаҳарларидан Дубай, Шаржа, Мадина, Доҳа, Жидда, Тель Авив, Теҳрон ва Кувайт йўналишларида амалга ошириладиган барча авиақатновлар бекор қилинган. Натижада Кувайт, Исроил, Саудия Арабистони, Қатар ҳамда БАА ҳудудларидан Ўзбекистон фуқаролари ватанга қайта олмаган.
