Исроил бош вазири Биньямин Нетаньяху АҚШ маъмуриятининг президент Дональд Трампдан ташқари барча асосий аъзолари қўллаб-қувватлашини йўқотган. Бу ҳақда Axios портали Оқ уйнинг номи ошкор қилинмаган амалдорига таяниб хабар бермоқда.
Маълумотларга кўра Исроил ҳукумати раҳбари Трамп билан 29 декабрь куни Флоридадаги Мар-а-Лаго мулкида учрашиши режалаштирилган.
“Нетаньяху уларни йўқотди. Унинг ихтиёрида қолган ягона одам — президент, у ҳали ҳам унга хайрихоҳ, аммо ҳатто Трамп ҳам Ғазо бўйича келишув ҳозирги суръатдан тезроқ ривожланишини истаяпти”, дея билдирган Оқ уй амалдори.
Унинг фикрича, Исроил бош вазири АҚШ вице-президенти Жей Ди Венс, давлат котиби Марко Рубио, Трампнинг куёви Жаред Кушнер, АҚШ президентининг махсус вакили Стивен Уиткофф ва Оқ уй аппарати раҳбари Сюзи Уайлснинг қўллаб-қувватлашидан маҳрум бўлган.
“Ўз навбатида, Трамп ва унинг жамоаси Нетаньяхуни АҚШ томонидан қўллаб-қувватлашни давом эттириш билан боғлаб, ҳарбий риторикадан воз кечишга чақирмоқчи”, дея ёзмоқда портал.
Ноябрь ойи ўрталарида БМТ Хавфсизлик кенгаши Трампнинг Ғазо секторидаги вазиятни ҳал қилиш бўйича кенг қамровли режасини қўллаб-қувватлаш учун АҚШ томонидан таклиф қилинган резолюцияни маъқуллади. Кенгашнинг 15 аъзосидан 13 нафари қўллаб-қувватлади, Россия ва Хитой бетараф қолди. АҚШнинг Ғазо бўйича режасида Ғазо секторини вақтинчалик халқаро бошқариш ва Трамп раислигида “тинчлик кенгаши” тузиш таклиф қилинмоқда. Шунингдек, халқаро барқарорлаштириш кучларининг куч мандати кўзда тутилган бўлиб, улар Исроил ва Миср билан ҳамкорликда жойлаштирилиши керак. Тинчликпарвар кучлар таркиби ҳақида ҳозирча маълумотлар йўқ.
