Швейцария ҳукумати АҚШ президенти Дональд Трампга қимматбаҳо совғалар бериш учун таниқли бизнесменлардан иборат делегацияни Америкага юборди. Асосий мақсад АҚШ томонидан жорий этилган божларни пасайтириш бўлган. Бу ҳақда манбаларга таяниб, Axios хабар берди.
Совғалар орасида Rolex компаниясининг махсус стол соати, шахсий 1 килограмм оғирликдаги махсус олтин қуймаси ва Трампга аталган “сахий мақтовлар тўплами” бор эди. Делегация таркибига қимматбаҳо металлар ва молия билан шуғулланувчи MKS SA компанияси раҳбари Марван Шакарчи, Rolex ва Richemont компаниялари бош директорлари Жан-Фредерик Дюфур ва Иоганн Руперт, шунингдек, Mercuria компанияси ҳаммуассиси Даниэль Жегги ҳамда Partners Group асосчиларидан Альфред Гантнер кирган.
Трамп ҳашаматли совғаларни жуда яхши кўради, айниқса олтин буюмлар ва эксклюзив нарсалар унинг эътиборига тез тушади ва унга ёқади, дейди манбалар
“Илгари Apple компанияси бунга эътибор қаратган эди. Август ойида компания бош директор Тим Кук Трампга компаниянинг АҚШга 100 миллиард долларлик янги инвестициялари шарафига 24 карат олтиндан ясалган ўйма шиша диск совға қилганди”, дейилади мақолада.
Ундан олдин Қатар ҳукумати Трампга 400 миллион долларлик Boeing 747 самолётини совға қилган, бир қатор корпорациялар эса тахминан 300 миллион доллар хайрия қилган. Бу маблағлар АҚШ президентига Оқ уйнинг бузилган қисми ўрнида улкан рақс залини қуришга ёрдам бериши керак эди, деб ёзади журналистлар.
Трамп маъмуриятидаги бир мансабдорнинг айтишича, Apple’нинг совғасидан ўзиб кетиш қийин эди, “аммо швейцарияликлар бунга эришди”. Бу дарҳол ўз натижасини берди, АҚШ ҳукумати Швейцария товарларига божларни 39 фоиздан 15 фоизгача туширишини эълон қилди.
“Бунга жавобан Швейцария савдо тўсиқларини камайтириш, Швейцария компаниялари эса АҚШга қўшимча инвестициялар киритиш мажбуриятини олди. Раҳбарлар даражасидаги бевосита музокаралар натижа бермагани сабабли швейцарияликлар бошқа йўлни танлади ва Трамп саноатчилар билан мулоқотни қадрлаганини ҳисобга олиб, миллий бизнес элитасининг етакчи вакилларидан иборат делегацияни юборди”, дея хулоса қилади Axios.
