Аввалроқ, Тошкент шаҳрининг Мирзо Улуғбек туманидаги мактабда 9-синф ўқувчилари ҳамда информатика фани ўқитувчиси жанжаллашиб кетгани ҳақида хабар берилганди. Ҳолат юзасидан ўқитувчига нисбатан жиноий иш қўзғатилди. Бу ҳақда пойтахт Ички ишлар бош бошқармаси хабар берди.
Маълум қилинишича, 19 май куни Мирзо Улуғбек туманида жойлашган 275-сонли мактабда вояга етмаган 2010 йилда туғилган Р.Р. ҳамда шу мактаб ўқитувчиси 2002 йилда туғилган З.О. тортишиб қолиб, ўзаро жанжаллашиб кетган. Аниқланишича, ўқувчи дарс жараёнида ўқитувчи томонидан берилган кўрсатмани бажармасдан, дарс машғулотларини ўтказилишига халақит берган. Жанжал вақтида ўқитувчи ўқувчига тан жароҳати етказган. Оқибатда жабрланувчи тиббий ёрдам учун шифохонага мурожаат қилган.
Мазкур ҳолат юзасидан ўқитувчига нисбатан Мирзо Улуғбек тумани ИИО ФМБ ҳузуридаги Тергов бўлими томонидан Жиноят кодексининг 105-моддаси (қасддан баданга ўртача оғир шикаст етказиш) билан жиноят иши қўзғатилган. Тергов давом этмоқда.
