Футбол бўйича Жаҳон ва Европа чемпиони Серхио Рамос Five Eleven Capital холдинги билан биргаликда Испаниянинг “Севилья” клубини сотиб олиш бўйича дастлабки келишувга эришди. Бу ҳақда Cadena SER нашри хабар берди.
Манбага кўра, ой охиригача якунланиши режалаштирилган битимнинг умумий қиймати 450 миллион еврони ташкил этади. Ҳозирда Рамос ва унинг ҳамкорлари клубнинг молиявий ҳисоботларини ўрганмоқда. Қайд этилишича, “Севилья” акциядорлари таклифни маъқуллаган.
39 ёшли Серхио Рамос “Севилья” академияси тарбияланувчиси бўлиб, асосий жамоа сафида 2004–2005 ҳамда 2023–2024 йилларда ҳаракат қилган. Унинг охирги клуби Мексиканинг “Монтеррей” жамоаси ҳисобланади.
Рамос Мадриднинг “Реал” клуби таркибида беш бор Испания чемпиони бўлган, икки марта мамлакат кубогини қўлга киритган. Шунингдек, у тўрт мартадан Чемпионлар Лигаси ва Клублар ўртасидаги Жаҳон чемпионатида ғолиб чиққан, уч марта УЕФА Суперкубогини ютган. Испания миллий терма жамоаси сафида эса 2010-йилда Жаҳон чемпиони, 2008 ва 2012-йилларда эса Европа чемпиони унвонларига сазовор бўлган.
