“Барселона” ва Бразилия терма жамоаси собиқ футболчиси Дани Алвес Португалиянинг учинчи дивизионида иштирок этаётган “Сан-Жуан-де-Вер” клубини сотиб олишни хоҳламоқда. Шунингдек, футболчи кейинги олти ой ичида профессионал футболга қайтиш имкониятини кўриб чиқмоқда. Бу ҳақда Globo нашри хабар берди.
Дастлабки таклиф шундан иборатки, у жамоа сафида ўйнаб, бир вақтнинг ўзида раҳбарлик вазифасини ҳам бажаради. Алвеснинг футболга қайтиши кейинги мавсумдан амалга ошади.
Маълумот учун, Дани Алвес 2024-йилнинг февраль ойида жинсий зўравонликда айбланиб, 4,5 йилга озодликдан маҳрум қилинган эди. Унга кўра, футболчи 2022 йил декабрь ойида Барселонадаги “Саттон” тунги клубида жабрланувчи қизга тажавузкор ҳаракатларни амалга оширган. Аммо 2025 йил март ойида Каталония суди томонидан зўрлаш ишида айбсиз деб топилган ва шартли равишда озодликка чиқарилганди.
Алвес фаолияти давомида “Барселона”, “ПСЖ”, “Севилья” ва “Ювентус” каби клублар шарафини ҳимоя қилган. Унинг охирги жамоаси Мексиканинг “Пумас” жамоаси ҳисобланди. Футболчи “Барселона” билан Испания чемпионлигини олти марта, Чемпионлар Лигаси совринини уч марта қўлга киритган, “Севилья” билан УЕФА кубогини икки марта, “ПСЖ” билан Франция чемпионатида икки марта ғолиб бўлган.
