Жанубий Корея Меҳнат рухсатномаси тизими (EPS) доирасида мамлакатга келаётган мигрант ишчилар учун корейс тили бўйича талабларни кучайтирмоқда. Бу ҳақда The Korean Times хабар берди.
Бунга мигрантларнинг тил тўсиқлари саноатда бахтсиз ҳодисаларга олиб келаётгани ва иш жойларида мулоқотни қийинлаштираётгани сабаб бўлган. Бандлик ва меҳнат вазирлиги ҳузуридаги Корея Инсон ресурсларини ривожлантириш хизмати E-9 визаси асосида келадиган ишчиларни танлашда қўлланиладиган суҳбат ва малака синовлари қайта кўриб чиқилишини маълум қилди. Ўзгаришлар иш берувчилар ўртасида ўтказилган сўров натижаларига асосланган.
Сўровга кўра, иш берувчиларнинг қарийб ярми мигрант ишчиларнинг корейс тилини билиш даражасидан норози. Энг кўп муаммолар иш кўрсатмаларини тушуниш (48,9 фоиз) ва хавфсизлик қоидаларини англаш (37,6 фоиз) билан боғлиқ.
Расмий маълумотларга кўра, чет эллик ишчилар умумий ишчи кучининг 3,4 фоизини ташкил этса-да, ўлим билан якунланган саноат бахтсиз ҳодисаларида уларнинг улуши 2022 йилда 9,2 фоизни, 2023 йилда 10,4 фоизни, 2024 йилнинг биринчи ярмида эса 11,8 фоизни ташкил этган. Тадқиқотлар чет эллик ишчиларнинг бахтсиз ҳодисаларга учраш даражаси маҳаллий ишчиларникидан икки-уч баравар юқори эканини кўрсатмоқда.
“Сўнгги ўзгаришлар чет эллик ишчиларнинг корейс тилини билиш даражасини ошириши ва хавфсизлик бўйича хабардорлигини кучайтиришини кутмоқдамиз. Биз иш берувчилар ва ишчилар учун бирдек хавфсиз ҳамда қониқарли бўлган ишлаб чиқариш муҳитини шакллантиришга хизмат қиладиган танлов тизимини ривожлантиришда давом этамиз”, деди агентликнинг халқаро ишчи кучи бўлими раҳбари Лим Сеунг Моок.
Шу сабабли танлов жараёнида суҳбат балларининг улуши оширилади, баҳолаш эса иш жойидаги топшириқларни тушуниш ва хавфсизликка оид билимларга йўналтирилади. Шунингдек, муайян соҳаларга хос иш терминлари ва буйруқларни тушунишни текширадиган саволлар сони кўпайтирилади.
Номзодларнинг мамлакатга киришдан олдин хавфсизлик қоидаларини қай даражада англаётганини аниқлаш учун чуқурлаштирилган саволлар жорий этилади. Корейс тили имтиҳонидан ўтиш учун белгиланган минимал балл ҳам оширилади. Қайта кўриб чиқилган мезонлар 2026 йилги баҳолашлардан бошлаб қўлланилади ва дастур доирасида 17 та ҳамкор давлат билан бўлишилади.
