Бразилиядаги космодромдан 22 декабрь куни учирилган Жанубий Кореянинг илк тижорат ракетаси қулаб тушди. Бу ҳақда Space хабар берди.
Ҳанбит-Нано номли ракета Innospace стартапига тегишли бўлган ва у Алькантара космодромидан учирилган. Аммо учирилганидан, тахминан, 30 дақиқа ўтиб, узунлиги 17,3 метр бўлган ракета Ерга қулаб тушган. Ҳозирча аварияга нима сабаб бўлгани номаълум.
Innospace парвоз вақтида носозлик (аномалия) юз берганини тан олган. Ҳанбит-Нано икки босқичли ракета ҳисобланади. Унинг биринчи босқичида суюқ кислород ва парафин ёнилғиси қўлланади. Юқори босқич эса икки хил конфигурацияда бўлиб, улардан бирида суюқ кислород ва парафин, иккинчисида эса суюқ кислород ва суюқ метан қўлланади.
Ракета Бразилиядан орбитага 90 килограммгача фойдали юкни олиб чиқишга мўлжалланган. Илк парвоз чоғида Ҳанбит-Нано Бразилия ва Ҳиндистондан бўлган мижозларга тегишли бешта кичик сунъий йўлдошни, шунингдек, технологияларни синовдан ўтказишга мўлжалланган яна учта юкни олиб чиққан.
Innospace 2017-йилда ташкил этилган, ҳозирда компанияда 260 га яқин ходим фаолият юритади. Компания бош директори Ким Су-жонгнинг айтишича, учиришга оид барча технологиялар тўлиқ компаниянинг ўзида ишлаб чиқилган. Innospace фақат Ҳанбит-Нано билан чекланиб қолмайди. У ҳозирда янада йирик ва қудратли Ҳанбит-Микро ҳамда Ҳанбит-Мини ракеталарини ишлаб чиқмоқда.
Маълумот ўрнида, ушбу учириш дастлаб 17 декабрга режалаштирилган эди. Бироқ техник носозликлар ва ноқулай об-ҳаво прогнозлари сабабли парвоз бир неча бор кейинга қолдирилган.
