Қўшма Штатлар президенти Дональд Трамп Жанубий Корея ва Тайван компанияларини АҚШ ҳудудида яримўтказгичлар ишлаб чиқаришга мажбурлаш учун божлардан ричаг сифатида фойдаланмоқчи. Бу ҳақда мамлакат савдо вазири Ховард Латник маълум қилди. Мулозимга кўра, агар бу давлатлар компаниялари Қўшма Штатларда чип ишлаб чиқаришни йўлга қўймаса, уларнинг маҳсулотларига 100 фоизгача божлар жорий этилиши мумкин.
Латник юқори технологияли ишлаб чиқариш стратегик аҳамиятга эга эканлигини таъкидлаб, мамлакат бу соҳада хорижий таъминот занжирларига қарамликни камайтириш учун иш олиб боришини айтди. Унинг сўзларига кўра, ишлаб чиқариш қувватларини ташкил этмаган ёки кенгайтирмаган давлатлар Қўшма Штатлар бозорига “амалдаги шартлар асосида кириш” имкониятидан маҳрум бўлиши мумкин.
Вазирнинг бу баёноти Оқ уй иқтисодий протексионизм сиёсатини юритаётган, хусусан, АҚШнинг Осиёдаги асосий савдо ҳамкорлари билан муносабатлар қайта кўриб чиқилаётган бир вақтда янгради. Трамп маъмуриятига кўра, Қўшма Штатлар узоқ йиллардан буён импорт қилинадиган чиплардан фойдаланмоқда. Мулозимлар фикрича, бу мамлакат миллий хавфсизлиги ва иқтисодий барқарорлиги учун жиддий хавфлидир.
Шу билан бирга, Латник, Қўшма Штатларга инвестиция киритишни режалаштираётган компаниялар юқори бож тарифларидан хавотирланмаса ҳам бўлишини таъкидлади. Яримўтказгичлар бозорининг энг йирик иштирокчиси Тайван мана шу муҳокамалар марказида турибди. У Қўшма Штатлар билан чиплар ишлаб чиқаришни кенгайтириш бўйича юзлаб миллиард долларлик келишув тузган.
Мутахассисларга кўра, Трамп маъмуриятининг 100 фоизлик божлар таҳдиди яримўтказгичларнинг глобал бозорига жиддий таъсир кўрсатади. Қолаверса, Қўшма Штатларнинг Осиё давлатлари билан савдо муносабатларида кескинликни келтириб чиқаради. Бундан ташқари, божлар инвестицияларнинг қайта тақсимланишига ҳамда харажатларнинг ошишига ҳам олиб келиши мумкин.
Дональд Трамп аввалроқ Эрон билан савдо алоқаларини давом эттираётган давлатларга 25 фоизлик божлар жорий қилган эди. АҚШ президенти, шунингдек, унинг Гренландияни эгаллаш режасига қарши чиққан мамлакатларга нисбатан ҳам бож қўллаш имкониятини кўриб чиқаётганини билдирган.
