Тадбиркор Илон Маск OpenAI ва Microsoft компанияларидан 134 миллиард долларгача компенсация ундиришни сўраб маҳкамага мурожаат қилди. Аризани АҚШ федерал суди кўриб чиқади. Миллиардернинг даъво қилишича, у OpenAI’ни дастлабки босқичда қўллаб-қувватлаган. Шу боис компания қўлга киритган “ноқонуний фойда” айнан унга тегишли бўлиши керак.
Судга тақдим қилинган ҳужжатларда ёзилишича, Маск 2015-йили ҳаммуассис сифатида OpenAI’ни ташкил этишда қатнашган. Тадбиркорнинг ўша даврдаги ҳиссаси сабаб компания 65,5 миллиард доллардан 109,4 миллиард долларгача, Microsoft эса OpenAI’нинг акцияларини сотиб олиш билан 25,1 миллиард долларгача фойда кўрган.
“Илон Масксиз OpenAI бу даражада эриша олмасди. У бошланғич сармоянинг асосий қисмини берди, ўзининг обрўсини ишга солди ва бизнесни кенгайтириш бўйича билимларини улашди. Етакчи мутахассис бу ҳиссаларнинг қийматини аниқ ҳисоблаб чиқди”, деган Маскнинг адвокати Стивен Моло.
OpenAI мазкур даъвога муносабат билдириб, Илон Маскнинг талаблари жиддий эмаслигини таъкидлади. Шунингдек, судга киритилган даъвони компанияга қарши олиб борилаётган “босим ва безовта қилиш кампаниясининг бир қисми” сифатида баҳолади. Microsoft эса Reuters’нинг дам олиш куни юборилган сўровига жавоб қайтармади.
Томонлар ўртасидаги даъволар
Илон Маск 2018-йилда OpenAI’дан кетган. Ҳозирда унинг компаниялари орасида ChatGPT’га рақобатчи xAI ҳам бор. xAI ўзининг X тармоғига интеграция қилинган Grok сунъий идрок чатботи билан машҳур. Тадбиркорга кўра, OpenAI инсоният манфаатларига хизмат қилиш ҳақидаги дастлабки миссиясидан четга чиқиб, фойда кўрувчи платформага айланиб қолган.
Миллиардер судга киритган ҳужжатларда у компанияга тахминан 38 миллион доллар, яъни дастлабки сармоянинг қарийб 60 фоизини тақдим этгани, кадрларни жалб қилишда ёрдам бергани таъкидланади. Бундан ташқари, тадбиркор муассисларни муҳим алоқалар билан боғлагани ва ўз репутациясидан фойдаланиб лойиҳа учун ишонч муҳитини яратгани қайд этилган.
Маск стартапга рисклар юқори бўлган эрта босқичда сармоя киритган инвестор сифатида дастлабки ҳиссасидан бир неча баробар каттароқ фойда талаб қилишга ҳақли эканини таъкидлаган. Шунингдек, у суддан жарима тўловлари ва қўшимча жазо чоралари сўраши ҳам мумкин. Бироқ OpenAI ва Microsoft бу даъволарни “ўйлаб топилган ва ишончсиз” деб баҳолаб, суддан ишни кўриб чиқмасликни сўрамоқда.
