Таиланд ва Камбоджа ҳарбийлари 24 февраль куни чегарада тўқнашув юз берганини маълум қилди. Таиланд томони қўшни давлатни 2025-йилги сулҳ битимини бузишда айблаётган бўлса, Пномпен қурол ишлатилганини рад этмоқда.
Таиланд ҳарбийлари баёнотига кўра, Сисакет чегара провинциясида Камбоджа кучлари Таиланд патрули яқинида 40 миллиметрли граната отган. Бунга жавобан Таиланд ҳарбийлари “огоҳлантириш ва ўзини ҳимоя қилиш мақсадида” М79 гранатомётидан ўт очган. Ҳодиса оқибатида таиландлик аскарлар орасида тан жароҳати олганлар йўқ.
Таиланд армияси расмийси Винтай Сувари бу ҳаракатни декабрь ойида имзоланган сулҳ битимининг қўпол равишда бузилиши деб баҳолади. Дастлабки тахминларга кўра, ўқ узилиши Камбоджа қўшинларининг ротацияси (алмашинуви) пайтида янги келган аскарларнинг тартиб-қоидаларни яхши билмаслиги оқибатида юз берган бўлиши мумкин.
Камбоджа: “Бу уйдирма”
Камбоджа Ахборот вазири Нет Феактра бу айбловларни мутлақо ёлғон ва жамоатчиликни чалғитишга қаратилган “уйдирма” деб атади.
“Камбоджа декабрь ойидаги сулҳ битимига содиқ қолади. Бир томонлама ва асоссиз айбловлар жойлардаги вазиятни нотўғри талқин қилишга ва ўзаро ишончга путур етказишга хизмат қилади”, деди вазир.
Камбоджа Мудофаа вазирлиги вакили Мали Сочеатанинг сўзларига кўра, портлаш ва ўқ овозлари ҳақидаги хабарлардан сўнг икки давлат ҳарбий алоқа гуруҳлари масалани муҳокама қилган ва Пномпен қурол ишлатилмаганини қатъий таъкидлаган.
Юз йиллик низоларнинг янги тўлқини
Жануби-шарқий Осиёнинг ушбу икки давлати ўртасидаги чегара можароси узоқ йилларга бориб тақалади. Ўтган 2025 йилнинг июль ва декабрь ойларидаги жангларда ўнлаб одамлар ҳалок бўлган, бир миллиондан ортиқ аҳоли ўз уйини тарк этишга мажбур бўлган эди.
Зиддиятлар Франция мустамлакачилиги даврида чизилган 800 километрлик чегара чизиғини турлича талқин қилишдан келиб чиқмоқда. Гарчи томонлар декабрь ойида ўт очишни тўхтатиш, қўшинлар ҳаракатини тўхтатиб туриш ва чегара ҳудудларини миналардан тозалашга келишиб олган бўлса-да, ўзаро ишончсизлик сақланиб қолмоқда.
Январь ойида ҳам Таиланд томони миномётдан ўққа тутилганини айтган, Камбоджа эса буни шунчаки “чиқинди уюмининг портлаши” деб тушунтирган эди.
