АҚШнинг Вашингтон штатидаги қоғоз заводида кимёвий резервуар портлаб кетди. Оқибатда бир киши ҳалок бўлди, яна тўққиз нафар ходим бедарак йўқолган деб ҳисобланмоқда. Бу ҳақда CBS News хабар берди.
Қайд этилишича, йирик фавқулодда ҳодиса Вашингтон ва Орегон штатлари чегарасида жойлашган Лонгвью шаҳридаги Nippon Dynawave Packaging Co. қоғоз фабрикасида юз берган. Корхонада қоғоз ишлаб чиқаришда қўлланиладиган кимёвий модда тўлдирилган резервуар портлаган.
Маҳаллий ҳокимият органларининг маълумотларига кўра, ҳодиса оқибатида камида бир киши ҳалок бўлган. Яна тўққиз нафар ишчи бедарак йўқолганлар рўйхатида турибди. Уларнинг оилалари бўлиб ўтган воқеа ҳақида хабардор қилинган.
Шунингдек, заводнинг саккиз нафар ходими ва бир нафар ўт ўчирувчи жароҳатланган. Айримлар куйиш ва нафас олиш йўлларининг шикастланиши ташхиси билан шифохонага ётқизилган. Жабрланганларнинг аҳволи енгилдан то ўта оғир даражагача деб баҳоланмоқда.
PeaceHealth St. John Medical Center шифохонасидан маълум қилишларича, авариядан сўнг тўққиз киши қабул қилинган. Кейинчалик тўрт нафар бемор Портленддаги куйиш марказига ўтказилган.
Ёнғин хавфсизлиги хизмати маълумотларига кўра, корхонада қоғоз саноатида қўлланиладиган, натрий гидроксиди ва натрий сульфиди асосидаги кимёвий эритма — “оқ ишқор” бўлган резервуар вайрон бўлган.
Дастлаб тахминан 80 минг галлон ҳажмдаги резервуар 60 фоизга тўла бўлгани хабар қилинган. Кейинчалик расмийлар сиғимда тахминан 900 минг галлон модда бўлганига аниқлик киритган. Авариядан сўнг шикастланган резервуар ичида тахминан 90 минг галлон кимёвий модда қолган бўлиши мумкин.
Қутқарувчиларнинг таъкидлашича, конструкция ҳали ҳам барқарор эмас ва фавқулодда хизматлар учун хавф туғдирмоқда. Ҳодиса сабаблари ҳозирча аниқланмаган.
“Ҳозирги вақтда биз бор эътиборимизни одамларни қутқариш ва вазиятни барқарорлаштиришга қаратганмиз”, дейди Коулиц округи ёнғин-қутқарув хизмати раҳбари Скотт Голдстейн.
Вашингтон штати губернатори Боб Фергюсон ҳам юз берган воқеага муносабат билдирган.
“Вашингтон штати аҳолиси номидан барча жабрланганларга айтмоқчиман: биз сиз билан биргамиз. Ёрдам бериш учун қўлимиздан келган барча ишни қиламиз”, дейди у.
Воқеа жойига 40 га яқин ўт ўчирувчи ва шифокорлар, шунингдек, хавфли моддалар билан ишлаш бўйича минтақавий гуруҳ сафарбар этилган. Корхонада жами 1000 га яқин киши меҳнат қилади.
