Таиландда россиялик икки сайёҳни ўлдиришда гумонланаётган икки нафар маҳаллий фуқаро қўлга олинди. Улар ўз айбига иқрор бўлган. Бу ҳақда Таиланднинг Thairath нашри хабар берди.
Маълум қилинишича, 22 ёшли Диана Назимова ва унинг 17 ёшли укаси Роман 26 июль куни эрталаб Паттайя шаҳрида бедарак йўқолган. Улар уйидан Honda русумли мотоциклда чиқиб кетган.
Орадан тахминан 20 дақиқа ўтиб, Бангкокда бўлган Диананинг онаси қизидан «Шошилинч!» мазмунидаги SMS-хабар олган. Шундан сўнг опа-ука билан алоқа узилган.
Бир неча кундан кейин улар фойдаланган мотоцикл қисмларга ажратилган ҳолда эски қабристон ҳудудидаги турли чуқурларга кўмилган жойидан топилган.
Ҳуқуқни муҳофаза қилувчи органлар 43 ёшли Тана Китхонг ва 39 ёшли Тхонгчай Синингни жиноятда гумон қилиб қўлга олган. Тергов маълумотларига кўра, гумонланувчилар опа-укани мотоциклни эгаллаб олиш мақсадида ўлдирганликларини тан олган.
Гумонланувчилардан бирининг кўрсатмасига кўра, Роман ҳужум вақтида қаршилик кўрсатган ва ўқотар қуролдан отиб ўлдирилган. Кейинчалик унинг опаси Диана ҳам калтаклаб ўлдирилган.
Гумонланувчилар 31 июль куни Камбоджа билан чегара яқинидаги Са-Каео провинциясида қочишга уринаётган вақтда қўлга олинган.
Терговчилар қурбонларнинг жасадлари Чонбури провинциясидаги Кхао Чи Чан тоғлари ҳудудида яширилган бўлиши мумкин деб ҳисобламоқда. Ҳозирча жасадлар топилмаган.
Ҳуқуқни муҳофаза қилувчи органлар гумонланувчиларни қурбонларнинг жасадлари яширилган бўлиши мумкин бўлган ҳудудга олиб бориб, қидирув ишларини давом эттиришни режалаштирмоқда.
