Кеча, 10 май куни Ўзбекистон U-17 терма жамоаси Осиё кубоги доирасида Ҳиндистон U-17 терма жамоасини 3:0 ҳисобида мағлуб этди. Ушбу ғалабадан сўнг Ўзбекистон ўсмирлар терма жамоаси муддатидан аввал гуруҳдан чиқиш вазифасини ҳал қилиб, Жаҳон чемпионати йўлланмасини қўлга киритди.
Учрашувнинг 32-дақиқасида Лазиз Абдураимов пенальти орқали ҳисобни очди. Иккинчи бўлимнинг 61-дақиқасида ҳиндистонлик футболчи ўз дарвозасига гол урди. 77-дақиқада эса Аҳрорбек Равшанбеков Ўзбекистоннинг йирик ҳисобдаги ғалабасини таъминлади.
Навбатдаги 3-тур учрашуви жорий йилнинг 13 май куни Австралия U-17 терма жамоасига қарши бўлиб ўтади. Австралия илк турда Ҳиндистонни мағлуб этганди. Ўзбекистоннинг ушбу ғалабаси эвазига яшил қитъа вакиллари ҳам Жаҳон чемпионати йўлланмасига эга чиқди.
Гуруҳдаги Шимолий Корея U-17 терма жамоаси мусобақага келмагани сабабли гуруҳда учта жамоа қолди. Натижада Ўзбекистон ва Австралия кейинги босқичга чиқишни таъминлади. Сергей Чигодаев бошчилигидаги Ўзбекистон ўсмирлар терма жамоаси энди 3-турда Австралияга қарши баҳсда гуруҳ ғолибини аниқлайди.
Маълумот учун, ушбу ёш тоифасидаги Жаҳон чемпионати жорий йилнинг 19 ноябридан 13 декабрига қадар Қатар яшил майдонларида бўлиб ўтади.
