Англиянинг “Ливерпуль” клубига эгалик қилувчи Американинг Fenway Sports Group инвестиция компанияси Мерсисайд клубидаги маълум бир улушини сотиш бўйича музокаралар олиб бормоқда. Бу ҳақда “The Financial Times” нашри хабар берди.
Манбага кўра, харидор Британия–Ҳиндистонлик бизнесмен ва Англиянинг “Куинз Парк Рейнжерс” клуби эгаси Амит Бҳатия бошчилигидаги инвесторлар консорциуми бўлиши мумкин.
Fenway Sports Group консорциум билан музокаралар олиб борилаётганини тасдиқлаган, бироқ ҳозирча томонлар ўртасида ҳеч қандай келишувга эришилмаганини таъкидлаган.
Агар келишув амалга ошса, клубнинг баҳоси 6 миллиард доллардан ортиқ бўлиши мумкин. Бу эса уни спорт тарихидаги энг йирик битимлардан бирига айлантиради.
Маълумот учун, “Ливерпуль” “Манчестер Юнайтед” билан биргаликда Англия чемпионатида энг кўп – 20 марта чемпионликни қўлга киритган клуб ҳисобланади. Шунингдек, мерсисайдликлар Европа Чемпионлар лигасида 6 марта ғолиб чиққан бўлиб, бу кўрсаткич бўйича Англия клублари орасида рекордчи ҳисобланади.
