Марҳумнинг яқинларининг билдиришича, у нафас олишга қийналгани учун бурнини операция қилдиришга қарор қилган. Сўраб-суриштириб, бу амалиётни ижобий фикрлар билдирилган Қорақамиш даҳасидаги хусусий клиникада амалга оширадиган бўлган. Жарроҳлик операциясидан аввал тегишли текширувлардан ўтган. Шифокорлар операцияга рухсат берган.
Бироқ 12 ноябрь куни соат 11:30 ларда операцияга кириб кетган эркак кўп ўтмай вафот этган. Унинг ўлими ҳақида яқинларига 3 соат ўтиб хабар берилган.
Мен аҳамият берганимда “операционний” кийим умуман йўқ. Қора футболка, эски шалварида ётибди. Ёрдамчи аппаратини ҳам кўрмадим. Юзлари, қонлари артилмаган. Бир оиланинг бошлиғи кетди. Иккита норасида гўдак қолди, деган марҳумнинг отаси.
Дастлабки маълумотларга кўра, беморнинг ўлимига анафилактик шок сабаб бўлган, юрак номаълум сабабга кўра тўхтаб қолган. Марҳумнинг яқинларининг фикрича, унга наркозни кўп бериб юборишган.
Бурун операцияси вақтида вафот этган йигит
Хабарда операция ўтказилган хусусий клиника номи тилга олинмаган. Тармоқларда тарқалган хабарларга кўра, у Олмазор туманида жойлашган “Иботов” клиникасида амалга оширилган. Марҳумнинг яқинлари ушбу клиника фаолиятини давом эттираётганидан, воқеадан сўнг шу пайтгача таъзия, ҳамдардлик ҳам билдирмаганидан норози эканини билдирган.
Маълум қилинишича, айни пайтда Олмазор тумани прокуратураси томонидан тергов ишлари олиб борилмоқда.
