Жиззахда йўл-патрул хизмати инспекторига пора таклиф қилган шахс қўлга олинди. Бу ҳақда Ички ишлар вазирлиги хабар қилди.
Қайд этилишича, Зомин туманида Дамас машинаси йўл белгиларига амал қилмасдан ҳаракатланиб келаётган вақтида ЙПХ инспектори томонидан тўхтатилиб, ҳайдовчига нисбатан маъмурий баённома расмийлаштириш жараёнида қоидабузар спиртли ичимлик истеъмол қилгани маълум бўлган.
Маст ҳайдовчи инспекторга маъмурий баённомадаги чорани енгилроқ турдаги қоидабузарликка ўзгартириб бериш эвазига пора таклиф қилган. Ходим эса Шахсий хавфсизлик бош бошқармасига ҳолат бўйича билдирги йўллаган.
Ўтказилган тезкор тадбирда Дамас ҳайдовчиси кичик йўл-патрул хизмати инспекторига маъмурий баённомани ўзгартириш ҳамда транспорт воситасини жарима майдонидан чиқариб бериш эвазига 900 доллар пулни пора тариқасида берган вақтида ашёвий далиллар билан ушланган.
Мазкур ҳолат юзасидан 1994 йилда туғилган шахсга нисбатан Жиноят кодексининг тегишли моддаси билан иш очилиб, тергов ҳаракатлари ўтказилмоқда.
