Россия ҳукумати 19 февраль куни Молия вазирлиги тайёрлаган «Россия Федерациясида чет эл фуқароларининг ҳуқуқий мақоми тўғрисида»ги қонун ва Солиқ кодексига ўзгартишларни кўриб чиқди. Янги таклифлар визасиз давлатлардан келган меҳнат мигрантлари учун иқтисодий шартларни янада кучайтиришни назарда тутади. Ҳужжатлар Владимир Путин топшириғи асосида ишлаб чиқилган бўлиб, 2027 йилдан кучга кириши мумкин.
Таклиф этилаётган тузатишларга кўра, патент асосида ишлайдиган чет элликлар тўлайдиган белгиланган тўлов қимматлайди. Энди Россияда вақтинча ёки доимий яшовчи ва жисмоний шахслар қўлида шахсий-маиший эҳтиёжлар учун ишлайдиган мигрантлар ҳам ушбу тўловни амалга ошириши шарт бўлади.
Яна бир муҳим ўзгариш — агар патент эгасининг вояга етмаган фарзандлари ёки бошқа қарамоғидаги бошқа ишсиз қариндошлари бўлса ҳам, ҳар бири учун асосий тўловнинг 50 фоизи миқдорида қўшимча ҳақ тўланади. Фарзанд 18 ёшга тўлгач, у мустақил равишда патент расмийлаштириши ёки яшаш учун бошқа ҳуқуқий асос бўлмаса, мамлакатни тарк этиши керак бўлади.
Ҳозирги базавий ойлик тўлов 1,2 минг рубль (191,2 минг Щзбек сщми) этиб белгиланган, аммо у минтақавий коэффициентлар билан кўпайтирилади. Москвада бу сумма ойига тахминан 10 минг рублга етади, бошқа ҳудудларда эса 3,4 минг рублдан 27,3 минг рублгача ўзгариши мумкин.
Қонун лойиҳаси Ички ишлар вазирлиги ва Солиқ хизмати ўртасида маълумот алмашинувини кучайтиришни ҳам кўзда тутади. Патентни узайтириш учун мигрант ўзининг соф даромади яшаш минимуми даражасидан кам эмаслигини тасдиқлаши керак бўлади. Бунда унинг ўзи ва оила аъзолари ҳисобга олинади. Солиқ органлари ҳар чоракда чет элликлар даромадлари ҳақидаги маълумотларни ИИВга тақдим этиб боради.
Агар ўзгартишлар қабул қилинса, улар меҳнат мигрантлари учун молиявий юкни ошириши ва расмий даромадларни қатъий назорат қилишга олиб келиши мумкин.
