Мьянманинг шимоли-шарқидаги Каунгтуп қишлоғида гелигнит (саноатда ишлатиладиган портловчи модда) сақланадиган омборда содир бўлган портлаш оқибатида камида 45 киши ҳалок бўлган, 70 га яқин киши тан жароҳати олган. Ҳалок бўлганлар орасида олти нафар бола ҳам бор, дея хабар берди Associated Press агентлиги.
Портлаш 31 май, якшанба куни тушга яқин содир бўлган. Қутқарувчиларнинг маълумотларига кўра, 74 нафар ярадор шифохонага етказилган, қидирув-қутқарув ишлари давом этмоқда. Минтақа билан чегарадош бўлган Хитой ҳукумати портлаш юз берганини тасдиқлаб, ўнлаб турар жой бинолари вайрон бўлганини қайд этган.
Портлаш содир бўлган ҳудуд Мьянма марказий ҳукуматидан мухторият талаб қилиб курашаётган исёнчи гуруҳлардан бири – Таанг миллий озодлик армияси (ТNLA) назорати остида. ТNLА баёнотида айтилишича, гелигнит кончилик ва тош карерларида фойдаланиш учун сақланган, портлаш сабаблари эса ўрганилмоқда.
Гелигнит вақт ўтиши билан, айниқса, нотўғри сақланган тақдирда, беқарор ҳолатга келиб қолади. Қутқарувчилардан бирининг сўзларига кўра, портлаш юздан ортиқ уйга ҳам зарар етказган.
Мьянма оммавий ахборот воситалари, жумладан, Шан штатининг Shwе Phее Мyay онлайн ахборот агентлиги, қурбонлар сони 50 дан 55 нафаргача бўлганини хабар қилмоқда.
