Сурхондарё вилояти Ангор туманида тез ёрдам хизматига бириктирилган автомобилни маст ҳолда бошқарган ҳайдовчига нисбатан суд ҳукми чиқарилди. Бу ҳақда “Миллар” репортажида маълум қилинди.
Қайд этилишича, 62 ёшли фуқаро туман тиббиёт бирлашмасида ҳайдовчи бўлиб ишлаган. У 14 май куни соат 21:10 атрофида ўзига бириктирилган Damas русумли хизмат автомобилини спиртли ичимлик таъсирида бошқариб юргани аниқланган.
Текширув давомида ҳайдовчи алкотестер ёрдамида кўрикдан ўтказилган. Натижада унинг организмида 0,755 мг/л алкоголь мавжудлиги қайд этилган. Ҳолат юзасидан Маъмурий жавобгарлик тўғрисидаги кодекснинг 131-моддаси бўйича баённома расмийлаштирилиб, материаллар судга юборилган.
Жиноят ишлари бўйича Ангор туман суди ҳуқуқбузарни айбдор деб топган. Суд қарорига кўра, у 3 йил муддатга транспорт воситаларини бошқариш ҳуқуқидан маҳрум қилиниб, базавий ҳисоблаш миқдорининг 40 баравари, яъни 16 миллион 480 минг сўм жаримага тортилган.
