Ливия қирғоқлари яқинида 55 нафар йўловчи, жумладан икки нафар чақалоқ бўлган резина қайиқ ағдарилиб кетди. Бу ҳақда БМТнинг миграция бўйича агентлигига таяниб, The Guardian хабар берди.
Ҳодиса оқибатида фақат икки нафар нигериялик аёл тирик қолган. Улар 6 февраль куни Ливия расмийлари томонидан қутқариб олинган. Қайиқда Африканинг турли мамлакатларидан келган мигрантлар ва қочқинлар бўлган.
Маълум қилинишича, қайиқ Ливиянинг ал-Завия қирғоқ шаҳридан жўнаб кетганидан тахминан олти соат ўтиб сув ола бошлаган ва чўкиб кетган. БМТ миграция агентлиги маълумотига кўра, 2026 йил бошидан буён Ливиядан Ўрта ер денгизи орқали ўтишга уриниш чоғида қарийб 500 нафар мигрант ҳалок бўлган ёки бедарак йўқолган.
Омон қолган аёллардан бири эридан айрилганини, иккинчиси эса икки нафар чақалоғи ҳалок бўлганини билдирган. Бир неча бор такрорланган фожиаларга қарамай, мигрантлар денгиз орқали ўтишга уринишда давом этмоқда.
Контрабанда ва одам савдоси тармоқлари мигрантларни ҳаддан ташқари тўла ва денгизга яроқсиз қайиқларга мажбуран жойлаб, бундан фойда кўрмоқда. Бу эса денгиздаги ўлимлар сонининг тобора ортишига олиб келмоқда. Шунингдек, чўкиб кетган кўплаб қайиқлар ҳақида уларни бошқараётган контрабандачилар томонидан ҳеч қачон хабар берилмайди. Ҳалок бўлганлар шунчаки бедарак йўқолади.
