Ўзбекистоннинг 6 та университети фанлараро тадқиқотлар бўйича халқаро рейтингда энг яхши 500 таликдан жой олди. Бу ҳақда Олий таълим, фан ва инновациялар вазирлиги матбуот хизмати хабар қилди.
Қайд этилишича, 2025 йил 20 ноябрь куни Times Higher Education халқаро рейтинг агентлиги Interdisciplinary Science Rankings 2026 — фанлараро илмий тадқиқотлар бўйича дунё университетлари рейтингини эълон қилди. Унда 94 мамлакатдан 1 267 та олий таълим муассасаси иштирок этган.
Натижаларга кўра, Ўзбекистоннинг 34 та олий таълим ташкилоти рўйхатдан жой олган бўлиб, уларнинг 6 таси энг яхши 500 таликка киритилган. Қолганлар эса reporter, яъни номзод мақомида қайд этилган.
Рўйхатда:
- “ТИҚХММИ” Миллий тадқиқот университети — 150-ўрин;
- Тошкент давлат иқтисодиёт университети — 201–250-ўрин;
- Ўзбекистон миллий университети, Самарқанд давлат университети, Тошкент давлат техника университети — 301–350-ўринлар;
- Тошкент давлат транспорт университети — 351–400-ўринларни эгаллаган.
Ушбу рейтинг молиялаштириш ва илмий ресурслардан фойдаланиш самарадорлиги, фанлараро тадқиқотлар учун яратилган инфратузилма ва бошқарув механизмлари, шунингдек, илмий нашрлар сифати, иқтибос кўрсаткичлари ва халқаро илмий ҳамжамиятдаги обрў-эътибор каби кўрсаткичларга асосланади.
Ўзбекистондаги 22 та ОТМ Осиёнинг энг яхши университетлари қаторига қўшилганди.
